Šturmam uziata kvatera milicyjanta, što strymlivaŭ śpiecnaz (+ videa)
dadałosia imia i detali, dadałasia infa HUUS
Jamu nadzieli kajdanki, skanfiskavana ŭsia technika.
Zatrymany były aficer milicyi, jaki viečaram 19 śniežnia ŭ čas akcyi pratestu apazicyi ŭhavorvaŭ śpiecnazaŭcaŭ nie ŭžyvać siłu suprać demanstrantaŭ.
Pozna ŭviečary 20 śniežnia ŭ svajoj kvatery na praśpiekcie Rakasoŭskaha ŭ Minsku byŭ zatrymany były aficer milicyi Alaksandr Kłaskoŭski. Videakadry, na jakich jon u kicieli lejtenanta milicyi i sa skryvaŭlenaj hałavoj uhavorvaje supracoŭnikaŭ milicejskaha śpiecnaza nie ŭžyvać siłu suprać demanstrantaŭ, ablacieli internet. Na ich Alaksandr kaža, źviartajučysia da milicyjantaŭ: «Vy što, idyjoty?.. Stukni lejtenanta! Ja šeść hadoŭ da jaho išoŭ, ja vojska prajšoŭ. Bi! Nu, surjozna, - ja ciabie bić nie budu, bi mianie!»
Kvateru A. Kłaskoŭskaha ŭziali šturmam troje supracoŭnikaŭ KDB u cyvilnym. Jany kanfiskavali kamputar, fotaaparaty, fłeš-karty, a samoha Kłaskoŭskaha pavieźli ŭ nieviadomym kirunku.
Alaksandr Kłaskoŭski prachodziŭ słužbu ŭ orhanach unutranych spravaŭ z sakavika 1999 hoda pa sakavik 2005 hoda.Pa zajavie MUS, «zarekamiendavaŭ siabie z admoŭnaha boku jak niedyscyplinavany supracoŭnik. Nieadnarazova dapuskaŭ parušeńni słužbovaj dyscypliny, za što pryciahvaŭsia da adkaznaści». Zvolnieny z MUS za kiravańnie aŭtamabilem u niećviarozym stanie.
Alaksandr - syn viadomaha biełaruskaha žurnalista, supracoŭnika infarmacyjnaj kampanii BiełaPAN Alaksandra Kłaskoŭskaha.
Jak raskazała siastra zatrymanaha Volha Kłaskoŭskaja, jaje brata mocna źbili padčas zatrymańnia: «Bili pa tvary i nyrkach, łajalisia, kazali, što pakažuć jamu ŭ «amierykancy» takoje žyćcio, što mała nie budzie. Abvinavacili ŭ tym, što jon nibyta plunuŭ u tvar śpiecnazaŭca. Ja havaryła z žonkaj Natallaj, jana ŭ šoku. Dobra, što doma ŭ toj momant nie było dziaciej».
Pa słovach Volhi, pakolki ŭ kvateru Alaksandra łamilisia nieviadomyja, była vyklikanaja milicyja.
Tyja, što ŭvarvalisia ŭ kvateru, pakazali prybyłym milicyjantam paśviedčańni supracoŭnikaŭ KDB, adno ź ich było na proźvišča Łahun, i zapatrabavali skłaści pratakoł za «iłžyvy vyklik».«Paźniej ja patelefanavała ŭ KDB, kab daviedacca pra los brata, ale mnie admovilisia dać infarmacyju, prapanavaŭšy pryjści na pryjom», - skazała siastra zatrymanaha i dadała, što maje namier źviarnucca ŭ pravaabarončyja arhanizacyi. Jana źbirajecca taksama arhanizoŭvać akcyi pratestu kala biełaruskaj ambasady ŭ Stakholmie, dzie žyvie ciapier. «Kali nie stvaryć hramadski rezanans, čałavieka mohuć paprostu ŭhrobić», - ličyć Volha Kłaskoŭskaja.
Jak paviedamiła BiełaPAN žonka zatrymanaha Natalla, ciapier Alaksandr Kłaskoŭski znachodzicca ŭ Hałoŭnym upraŭleńni papiaredniaha rasśledavańnia HUUS Minharvykankama.