Zatrymany vandał z Baranavič
U Baranavičach zatrymany21-hadovy miascovy žychar, jaki vykraŭ z čatyroch pomnikaŭ na mahiłach na mohiłkach «Rusina» łatunnyja łampadki. Dźvie ź ich — z pomnikaŭ vajennych lotčykaŭ Alaksandra Marfickaha i Alaksandra Žuraŭleviča, jakija zahinuli 30 žniŭnia 2009 hoda na avijašou ŭ polskim Radamie.
Jak paviedamili ŭ Baranavickim RAUS, vykradzienyja łampadki byli znojdzieny supracoŭnikami milicyi 26 studzienia ŭ baranavickaha skupščyka łomu kalarovych mietałaŭ, jakomu małady čałaviek zbyŭ vykradzienaje. Łampadki kanfiskavany, praviarajecca datyčnaść zatrymanaha da jašče adnaho anałahičnaha kradziažu na hetych ža mohiłkach.
Zatrymany małady čałaviek nie pracuje, raniej byŭ sudzimy za kradziež. Jon źmieščany ŭ IČU. Pavodle słoŭ zatrymanaha, jon vykraŭ čatyry łatunnyja łampadki za adzin raz z metaj dalejšaha prodažu, tamu što jamu byli patrebny hrošy.
Jak raniej paviedamlałasia, 24 studzienia ŭ milicyju źviarnulisia žychary horada z zajavami ab kradziažach z pomnikaŭ na mahiłach ich svajakoŭ. Baranavickim rajonnym adździełam unutranych spraŭ była raspačata sprava na padstavie č 1. art. 205 Kryminalnaha kodeksa (kradziež).
Pavodle źviestak śledstva, 19 studzienia łampadki jašče byli na mahiłach lotčykaŭ, 23 studzienia ŭdava Alaksandra Marfickaha, kali pryjšła na mohiłki, ubačyła, što jany źnikli. Usie čatyry abkradzienyja mahiły raźmieščany niedaloka adna ad adnoj. Vykradzienyja łampadki byli zamacavany na pomnikach. Košt adnoj składaje ad 300 da 360 tysiač rubloŭ.