Biaduleŭski kałhas «Sovietskaja Biełaruś» zbankrutavaŭ, likvidavany
Kali b havorka išła pra lubuju inšuju haspadarku, hetaja rearhanizacyja napeŭna zastałasia b niezaŭvažanaj.Za apošnija hady niekalki dziasiatkaŭ byłych kałhasaŭ i saŭhasaŭ, što tak i nie zdoleli vyjści na rentabielny ŭzrovień pracy, byli dałučanyja da bolš paśpiachovych pradpryjemstvaŭ i pierastali isnavać jak samastojnyja adzinki. Ale hetym razam u razrad «bieznadziejna stratnych» trapiła haspadarka, jakaja hrymieła na ŭvieś Saviecki Sajuz.
Chto nie viedaŭ tady pra Ordena Pracoŭnaha Čyrvonaha Ściaha kałhas «Savieckaja Biełaruś» i jaho lehiendarnaha staršyniu, dvojčy Hieroja sacyjalistyčnaj pracy Uładzimira Biadulu? Ciapier hetaj haspadarki niama.Rašeńniem Kamianieckaha rajvykankama ad 9 lutaha 2011 hoda SVK «Savieckaja Biełaruś» dałučany da AAT «Biełaviežski». Asnoŭnaja pryčyna — vializnyja pazyki pradpryjemstva, jakija, jak vykazaŭsia kiraŭnik rajonnaj viertykali Andrej Pisaryk, «užo nie pakinuli miesca dla iluzijaŭ».
Prablemy ŭ znakamitaj haspadarcy pačalisia jašče za Uładzimiram Biadulem. U sakaviku 2007 hoda było pryniataje rašeńnie adpravić ardenanosnaha staršyniu ŭ adstaŭku — praź miesiac paśla taho, jak Uładzimira Lavonćjeviča z usimi mahčymymi ŭšanavańniami pavinšavali z
«Uładzimir Lavoncievič adpracavaŭ svajo. Jon addaŭ vam usio: rozum, vopyt, siły i volu. «Savieckaj Biełarusi» patrebnaja novaja kroŭ…» — pierakonvała tady na schodzie rabotnikaŭ haspadarki namieśnik ministra.
Na žal, nadziei na «novuju kroŭ» nie apraŭdalisia. Sychod Biaduli nie vyrašyŭ prablemaŭ haspadarki, a, mabyć, pahoršyŭ stanovišča.Jaho pierajemnik na hetaj pasadzie Anatol Laŭdanski ŭziaŭsia navodzić u «Savieckaj Biełarusi» paradak z usioj enierhijaj i entuzijazmam, ale siłaŭ, mabyć, nie raźličyŭ. U vyniku i sam zhareŭ, i pazyčanaść haspadarki tolki vyrasła. U tym liku za uziatuju ŭ lizinh novuju techniku.
Nu, a dalej usio pakaciłasia jak śniežny kom. Siońnia ŭ «Savieckaj Biełarusi» adzin z samych nizkich u rajonie zarobkaŭ. U siarednim za 2010 hod jon skłaŭ 651,4 tysiačy rubloŭ (dla paraŭnańnia: siaredniaja zarpłata pa Kamianieckim rajonie za hety čas — 894 tys.). Ale i hetych hrošaj haspadarka nie zarabiła. U apošnija hady jaje aktyŭna padtrymlivała SAAT «Biełaviežskija syry», jakoje nie tolki raźličvalisia za pastaŭlenaje jamu na pierapracoŭku małako, ale i avansavała haspadarku. U vyniku da 1 lutaha 2011 pazyčanaść «Savieckaj Biełarusi» hetamu pradpryjemstvu skłała 2 młrd 360 młn rubloŭ. Ahulnaja ž pazyčanaść haspadarki ŭsim kredytoram pierasiahnuła 15 młrd rubloŭ.
«Nam niaprosta było pryniać hetaje rašeńnie (ab dałučeńni «Savieckaj Biełarusi» da «Biełaviežskaha»), — pryznajecca staršynia Kamianieckaha rajvykankama Andrej Pisaryk. — Ale situacyja takaja, što inšaha vychadu prosta niama».
I ŭ SVK «Savieckaja Biełaruś», i ŭ AAT «Biełaviežski» ŭžo prajšli schody pracoŭnych kalektyvaŭ, dzie byli pryniatyja rašeńni ab źlićci dźviuch haspadarak u adnu. Nie abyšłosia biez emacyjnych sprečak.
U nieabchodnaści takoha kroku było ciažej za ŭsio pierakanać pažyłych ludziej, jakija nie adzin hod prapracavali ŭ kałhasie «Savieckaja Biełaruś» i pamiatajuć časy, kali jon byŭ na piku słavy.Mienavita jany hałasavali suprać rearhanizacyi. Ale bolšaść, stomlenaja ad biazładzicy ŭ haspadarcy, vykazałasia za.
Viaskoŭcy nie stračvajuć nadziei, što AAT «Biełaviežski», pradpryjemstva mocnaje i stabilnaje, jakoje ŭznačalvaje aŭtarytetny ŭ halinie kiraŭnik Juryj Maroz, paciahnie i hetuju nošu. Z ulikam dałučanych ziemlaŭ «Savieckaj Biełarusi» płošča jaho ŭhodździaŭ vyrasła da 19 640 ha.
Nu, a «Savieckaja Biełaruś» ź jaje ordenami, pracoŭnymi ździajśnieńniami i lehiendarnym staršynioj zastałasia tolki ŭ historyi.