Jak kidki žurnaliscki zahałovak kinuŭ cień na Michaleviča

U paviedamleńni radyjo «Svaboda» havaryłasia «Michalevič razarvaŭ damovu», ale «Chartyja» pierakłała heta jak «Michalevič razorvał zajavlenije». U vyniku ŭ Kostki źjavilisia sumnievy: «Navošta kamitetčyki dali jamu hetuju padpisku na ruki?».

28 lutaha, u apošni dzień zimy, Aleś Michalevič šakavaŭ śviet svaim pryznańniem ab katavańniach u SIZA KDB.

Fota Siarhieja Hudzilina.

«Mnie było prapanavana padpisać damovu ab supracoŭnictvie z KDB. U vypadku majoj zhody ja moh być vypuščany pad padpisku ab niavyjeździe. Ja pahadziŭsia padpisać pahadnieńnie ab supracoŭnictvie z KDB dla taho, kab vyjści na svabodu i raskazać usim ab tym, što siońnia adbyvajecca ŭ samym centry Miensku. Liču moj publičny vystup admovaj ad supracoŭnictva z KDB», — takimi słovami skončyŭ A.Michalevič svoj zvarot da žurnalistaŭ.

Prykładna praz 20 chvilin paśla hetaha na sajcie «Chartyja-97» źjaviŭsia materyjał «Michalevič razryvaje supracoŭnictva z KDB» tekst nastupnaha źmiestu: «Były kandydat u prezidenty Alaksiej Michalevič zajaviŭ, što padpisaŭ raniej zajavu ab supracoŭnictvie z KDB. Na hetych umovach jaho vyzvalili pad padpisku ab niavyjeździe. Na pres-kanfierencyi ŭ Minsku Michalevič razarvaŭ hetuju zajavu».

Što cikava, žurnalisty «Chartyi» sami na pres-kanfierencyi nie prysutničali — što zrazumieła, kali ŭličyć źniavoleńnie Radzinaj i inšych aktyvistaŭ. Jany prosta takim čynam interpretavali paviedamleńnie radyjo «Svaboda», jakoje pieradrukavali.

U paviedamleńni radyjo «Svaboda» havaryłasia «Michalevič razarvaŭ damovu», ale «Chartyja» pierakłała heta jak «Michalevič razorvał zajavlenije», a paśla vykanała zvarotny pierakład na biełaruskuju «Michalevič razarvaŭ zajavu».

I tut ža heta vyklikała pytańni. Maŭlaŭ, KDB nikoli nie vydaje na ruki kopij damovaŭ ab sakretnym supracoŭnictvie, nie mahło jaho vydać i Michaleviču. A značyć, jon moža chłusić. «Navošta kamitetčyki dali jamu hetuju padpisku na ruki? Kab jon moh ŭsim pakazvać, što jon sakretny supracoŭnik? Tut u mianie da Michaleviča bolš pytańniaŭ, čym adkazaŭ», — tak u vyniku analizavaŭ zajavu Michaleviča padpałkoŭnik KDB ŭ adstaŭcy Valeryj Kostka, i nie adzin jon.

Pamyłkovuju mietafaru niekatoryja čytačy ŭspryniali litaralna. Maŭlaŭ, «razarvaŭ zajavu» na pres-kanfierencyi, značyć prynios jaje tekst z saboj, kab pierad fota- i videakamierami parvać na šmatki.

Sam eks-kandydat niepryjemna ździŭleny źjaŭleńniem paviedamleńniaŭ ab nibyta razarvanaj im na vačach u žurnalistaŭ damovie z KDB. «Ja nie viedaju, adkul heta mahło ŭziacca. Ničoha ja nie rvaŭ i nijakich kopij damovy ab supracy z KDB mnie nie davali.

Heta čarhovy napamin usim žurnalistam, jakimi dakładnymi treba być u pieradačy faktaŭ.

Kamientary da artykuła