Pamiaci Davida Branštejna
in memoriam
U Miensku pamior David Jonavič Branštejn, hienij klasyčnych šachmat, čyj los byŭ źnitavany ź Biełaruśsiu.
U Miensku pamior David Jonavič Branštejn, hienij klasyčnych šachmat, čyj los byŭ źnitavany ź Biełaruśsiu. Było jamu 82 hady. Apošnim časam jon chvareŭ i zakinuŭ šachmatny śviet, jaki ŭzbahaciŭ i cudoŭnymi kambinacyjami, i daścipnymi idejami, i litaraturnymi tvorami. Dla jaho šachmaty, nasupor sučasnym tendencyjam, byli pieradusim častkaj kultury.
Ciaham 90-ch Branštejn raźjaždžaŭ pa śviecie i davoli paśpiachova vypraboŭvaŭ siłu kamputarnych prahram. Kab Uładzimier Kramnik braŭ u jaho kansultacyi – naŭrad ci prajhraŭ by matč «Frycu-10». Adnak stary David schavaŭsia ŭ mienskaj kvatery razam z žonkaj Tacianaj Balasłaŭskaj, ściarohsia kantaktaŭ z kalehami i reparterami.
Adnojčy mnie paščaściła sustrecca z čałaviekam-lehiendaj. Było heta hod tamu ŭ šachmatnym klubie «Viaśnianka», kudy Branštejn zredčas zavitvaŭ. Jon moŭčki chadziŭ miž stolikami, ab niečym razvažaŭ. Svaju knihu «Mižnarodny turnir hrosmajstraŭ» (1956) padpisać admoviŭsia: «At, siarednieńkaja kniha…». Tym nia mienš, jana była i zastałasia jasnym padručnikam dla pakaleńniaŭ.
David Branštejn byŭ pachavany na Čyžoŭskich mohiłkach 7 śniežnia, pobač sa svaim starejšym siabram, mienskim hrosmajstram Isakam Balasłaŭskim. Viečnaja pamiać!