Kahebist liberalny – novy kandydat u pierajemniki Pucina
U baraćbu za rasiejskaje prezydenckaje kresła ŭklučyŭsia Siarhiej Čemiezaŭ, dyrektar firmy «Rosoboroneksport», manapalista ŭ handli rasiejskaj zbrojaj. Z Pucinym jon znajomy z savieckaj raźviedki
U baraćbu za rasiejskaje prezydenckaje kresła ŭklučyŭsia Siarhiej Čemiezaŭ, dyrektar firmy «Rosoboroneksport», manapalista ŭ handli rasiejskaj zbrojaj. Z Pucinym jon znajomy z savieckaj raźviedki
Prezydenckija vybary ŭ Rasiei majuć adbycca ŭ 2008 h., adnak užo ciapier niekalki kandydataŭ na čarhovaha haspadara Kramla pretendujuć na hołas adzinaha istotnaha vybarščyka – prezydenta Ŭładzimiera Pucina. Mienavita jaho padtrymka padčas vybarčaj kampanii daść kandydatu kamfotnaje absłuhoŭvańnie televizijaj, dapamohu miascovaj administracyi i vializnyja hrošy.
Pamknieńni Čemiezava, jakoha ŭ subotu abrali ŭ kiraŭnictva kirujučaj partyi «Jedinaja Rośsija», byli na hetym tydni paćvierdžanyja vialikim interviju ŭva ŭradavaj «Rośsijskoj hazietie». Čemiezaŭ – blizki znajomy Pucina, jakoha viedaje z časoŭ pracy ŭ savieckaj raźviedcy ŭ HDR.
— My žyli pa susiedztvie. Vielmi časta razmaŭlali jak na słužbovyja, tak i na asabistyja temy – pryznaŭsia niadaŭna Čemiezaŭ. U 90-ja hh. abodva byłyja raźviedčyki znajšli pracu ŭ tym samym adździele kancylaryi Kramla.
Kali Pucin staŭ prezydentam, jon pačaŭ favaryzavać Čemiezava i ŭrešcie pastaviŭ jaho na čale vializnaha i zamožnaha manapalista ŭ handli rasiejskaj zbrojaj. Čemiezaŭ na hetaj pasadzie apraŭdaŭ akazany jamu davier i davoli spraŭna vyvieŭ «Rosoboroneksport» z zaniapadu i viarnuŭ jamu pazycyju adnaho z najbujniejšych eksparteraŭ zbroi ŭ śviecie.
Suviazi palityčnych elitaŭ ź biaśpiekaj i raźviedkaj prymušajuć šmat jakich rasiejcaŭ padazravać, što heta słužby kirujuć krainaj. Adnak abaroncy Pucina pierakonvajuć, što byłyja supracoŭniki raźviedki prosta paraŭnalna mała schilnyja da karupcyi i alkahalizmu, a taksama naležać da najbolš kampetentnych čynoŭnikaŭ.
— Kali jany vystajali na zamiežnych punktach raźviedki, dyk značyć, nia durni. Tamu jany i źjaŭlajucca asnoŭnaj krynicaj kadraŭ – tak niadaŭna «Hazecie vyborčaj» patłumačyŭ adzin uradavy biurakrat.
Masmedyja ŭžo hod jak pišuć pra dvuch asnoŭnych kandydataŭ na pierajemnika Pucina – vice-premjeraŭ Dźmitryja Miadźviedzieva i Siarhieja Ivanova. Sioleta ŭviesnu niekatoryja publicysty ŭklučyli ŭ hetuju hrupu i kiraŭnika rasiejskaj čyhunki Ŭładzimiera Jakunina.
Rasiejcy časam paraŭnoŭvajuć pieradvybarčuju baraćbu favarytaŭ Pucina ź bitvami ŭ śniažki, da jakich prymušaŭ svaich prydvornych car Piotar Vialiki. Kankurencyja prezydenckich nastupnikaŭ, adnak, nia jość čystaj zabavaj. Bo kožny z favarytaŭ šukaje padtrymki mocnych łobi (pramysłovych, vajskovych), miž jakimi Pucin musić balansavać taksama i pry vybary nastupnika.
Čemiezaŭ usprymajecca jak čałaviek, zdolny abjadnać intaresy vajskovych hrupaŭ upłyvu (praz kantrol nad vajennaj pramysłovaściu) z h.zv. kramloŭskimi liberałami. Pieršyja čutki pra pryznačeńnie Čemiezava premjeram źjavilisia ŭžo sioleta ŭviesnu. Šlach Pucina da pasady prezydenta taksama vioŭ praz pasadu kiraŭnika ŭradu.
Fota expert.ru