Žyć zvyčajnym žyćciom — asnova supraćstajańnia teraryzmu

Terarysty, adzin raz štości abo kahości ŭzarvaŭšy, na hetym nie spyniacca. Takoje mierkavańnie ŭ intervju BiełaPAN vykazaŭ kiraŭnik Centra pravavoj i psichałahičnaj dapamohi ŭ ekstremalnych situacyjach (Maskva), doktar miedycynskich navuk prafiesar psichijatryi Michaił Vinahradaŭ.

Terakt źjaŭlajecca zaraźlivym dla tych, chto maje adchileńni ŭ chimii mozhu, skazaŭ jon. Prafiesar psichijatryi padkreśliŭ, što ŭ mozhu niekatorych ludziej z-za roznych pryčyn (unutryvantrobnaja traŭma abo infiekcyja, miechaničnaja, elektratraŭma, infiekcyja typu mieninhitu, encefalitu) adbyvajucca pracesy, jakija zapuskajuć patałahičnyja miechanizmy. Takim čynam, nianaviść da ludziej i ahresija majuć bijałahičnuju asnovu.

«Jašče ŭ 1980-ja hady KDB SSSR papiaredžvaŭ usie respubliki, što my vyjšli na ściežku teraryzmu. Tak jano i adbyłosia. Sučasny teraryzm śpiecyjalisty aceńvajuć jak paŭzučuju treciuju suśvietnuju vajnu. Tak, ad ruk terarystaŭ buduć hinuć ludzi, ale ŭ cełym i ŭ Rasii, i ŭ Biełarusi ludzi buduć žyć, jak žyli, jak žyvie Izrail, — naradžać dziaciej, kachać adzin adnaho, chadzić u hości, kino, teatr. Žyć zvyčajnym žyćciom — asnova supraćstajańnia teraryzmu», — skazaŭ Vinahradaŭ. Jon padkreśliŭ, što kali nie atrymlivajecca viarnucca da zvyčajnaha žyćcia, nieabchodna źviartacca da śpiecyjalistaŭ.

Havoračy ab psichałahičnych asablivaściach asoby terarysta, Vinahradaŭ adznačyŭ, što pa sutnaści taki indyviduum źjaŭlajecca «čałaviekanienaviśnikam». «Terarystami ruchaje žadańnie zabivać, pryčyniać bol navakolnym i praz heta samaśćviardžacca. Časta heta nianaviść spałučana sa skažonaj sieksualnaściu», — skazaŭ psichijatr.

Vinahradaŭ adznačyŭ, što terarysty, mańjaki, sadysty mohuć vieści samaje zvyčajnaje žyćcio. Jany «pracujuć nastaŭnikami, ślesarami, buchhałtarami, lubiać svaich dziaciej, źjaŭlajucca kłapatlivymi mužami i dobrymi žonkami, majučy parušeńni ŭ hłybinnych adździełach hałaŭnoha mozhu, zastajučysia ŭ bolšaści vypadkaŭ pry śviadomaści».

Prafiesar ličyć, što jašče ŭ škole nieabchodna ŭvieści śpiecyjalnaje psichałahičnaje testavańnie, jakoje dazvalaje vyjavić pavyšanuju ahresiŭnaść u dziaciej. Nieabchodna prymać pastajannyja miery biaśpieki i padtrymlivać ich u hramadstvie. U jakaści prykładu jon pryvioŭ situacyju ŭ Izraili, dzie dziakujučy pracy raźviedki, a taksama naściarožanaści nasielnictva adnosna teraktaŭ «dola papiaredžanych teraktaŭ u dziasiatki razoŭ pieravyšaje dolu ŭčynienych». Praca pa papiaredžańni teraryzmu patrabuje materyjalnych zatrat, «ale zachoŭvaje žyćci ludziej». Vinahradaŭ ličyć usieahulnaje daktyłaskapavańnie, jakoje pravodzicca ŭ Biełarusi, «razumnym padychodam, bo heta rezka pavyšaje raskryćcio złačynstvaŭ».

Kamientary da artykuła