Łukašenka pad «šumok» zvolniŭ niekalki ŭpłyvovych čynoŭnikaŭ

Usia ŭvaha ŭ hetyja dni było prykavana da navinaŭ ab rasśledavańni teraktu ŭ minskim mietro. Ale, jak vyśviatlajecca, «pad šumok» hetych padziej Alaksandr Łukašenka zvolniŭ z zajmanych pasadaŭ niekalki vielmi upłyvovych pierson.

Tak, pasadu namieśnika staršyni Dziaržaŭnaha mytnaha kamiteta pakinuŭ Vasil Dziemianciej. Aficyjnaja farmuloŭka — «u suviazi ź pieravodam na inšuju pracu». Nahadajem, što Dziemianciej u svoj čas źjaŭlaŭsia pieršym namieśnikam staršyni Kamiteta dziaržaŭnaj biaśpieki. Mieŭ samaje niepasrednaje dačynieńnie da rasśledavańnia viciebskich vybuchaŭ u 2005 hodzie. Prynamsi, mienavita jon dakładvaŭ ab tym, što «padazravanyja zatrymanyja».

Dziemianciej pakinuŭ strukturu spadčyńnikaŭ viedamstva Fieliksa Dziaržynskaha ŭ 2007 hodzie adnačasova z tahačasnym kiraŭnikom viedamstva Ściapanam Sucharenka. I vielmi chutka znajšoŭ dla siabie novuju nivu — u mytnym kamitecie.

Z čym źviazana ciapierašniaje zvalnieńnie, pakul niezrazumieła. Adnak źviartaje na siabie ŭvahu toje akaličnaść, što ŭ staršyni DMK adnačasova zvolnieny jašče adzin namieśnik — Leanid Dosaŭ.

Akramia taho, «pa pahadnieńni bakoŭ» pazbaviŭsia pasady namieśnik staršyni Vajenna-pramysłovaha kamiteta Aleh Pafieraŭ. Nahadajem, što hienierał Pafieraŭ da 2006 hoda źjaŭlaŭsia kamandujučym vajenna-pavietranymi siłami i vojskami SPA. Na hetaj pasadzie jaho źmianiŭ toj samy Ihar Azaronak, jaki byŭ zatrymanym praź niekalki dzion paśla viadomych padziejaŭ na Płoščy, i pra los jakoha z tych časoŭ ničoha nie paviedamlałasia.

Kamientary da artykuła