«Achova ptušak Baćkaŭščyny» arhanizoŭvaje ŭ Minsku ekskursii dla vyvučeńnia ptušynych hałasoŭ

10.06.2011 / 10:11

Jak paviedamiŭ śpiecyjalist pa ekałahičnaj adukacyi APB Rusłan Šajkin, padobnyja ekskursii nidzie bolš u Biełarusi nie pravodziacca. U ich miežach usie achvotnyja pad kiraŭnictvam vopytnych śpiecyjalistaŭ-arnitołahaŭ

mohuć pasłuchać ptušak u zialonych zonach stalicy: zakaźniku «Labiažym», Łošyckim parku, Bataničnym sadzie, pojmie Śvisłačy ŭ Čyžoŭcy.

Udzielniki ekskursij navučacca adroźnivać ptušak pa hałasach i daviedajucca šmat novaha pra žyćcio ptušak.

Jak paviedamiŭ Šajkin, siarod ptušak, jakija lohka paznavalnyja pa śpievie, — sałaviej, pienačka-cieńkaŭka, drač, bieraścianka, vałasianka-zaviruška. Adnak, pavodle jaho słoŭ, nichto nie moža harantavać, što ptuški ŭsich hetych vidaŭ buduć śpiavać padčas ekskursii. Zadača arnitołahaŭ — navučyć udzielnikaŭ ekskursii adroźnivać choć by piać vidaŭ ptušak, a pa mahčymaści — bolš, skazaŭ śpiecyjalist.

Jon padkreśliŭ, što niekatoryja vidy ptušak (naprykład, raznavidnaści čaracianki) možna adroźnić tolki pa hałasach, źniešnie jany vielmi padobnyja. Tamu ekskursija moža ŭjaŭlać asablivuju kaštoŭnaść dla budučych śpiecyjalistaŭ-bijołahaŭ.

Ekskursii arhanizujucca pa zajaŭkach achvotnych dla hrup kolkaściu da 10 čałaviek.

Jany pravodziacca ŭ miežach tradycyjnaj akcyi APB pa ŭliku sałaŭjoŭ, jakaja prachodzić ź siaredziny maja. U miežach hetaj akcyi haradskim žycharam prapanoŭvajecca paviedamlać pra miescaznachodžańnie pieŭčych sałaŭjoŭ u ofis APB. Pa vynikach ulikaŭ składajecca sałaŭinaja karta Minska.

Pavodle słoŭ Šajkina, usiaho ŭ Minsku naličvajecca kala 180 vidaŭ ptušak, u stalicy — bolš za 350 par sałaŭjoŭ.

Čytajcie taksama:

Kamientary da artykuła