Udzielnikaŭ akcyi «Stop-bienzin» «prabili» pa bazie i vyklikajuć u DAI

Zatrymać parušalnikaŭ na miescy akcyi nie było mahčymaści, bo ich było bolš, čym supracoŭnikaŭ milicyi.

Staličnaja DAI ŭžo prystupiła da vykanańnia svajho abiacańnia znajści ŭsich udzielnikaŭ akcyi «Stop-bienzin-4» i vyklikać ich na razmovu.

Raniej u DAI zajaŭlali, što zatrymać parušalnikaŭ niepasredna 7 červienia, kali prachodziła akcyja, nie było mahčymaści, bo ich było bolš, čym supracoŭnikaŭ milicyi. Adnak pravaachoŭnymi orhanami viałasia apieratyŭnaja zdymka, na padstavie jakoj i mierkavałasia vyličyć parušalnikaŭ i pryciahnuć ich da adkaznaści.

U pres-słužbie UDAI HUUS Minharvykankama kolkaść užo vyklikanych na razmovy ŭdzielnikaŭ akcyi i tych, chto najbližejšym časam rušyć uśled za imi, nazvać pakul nie mohuć. Nie zmahli ŭ DAI adkazać i na pytańnie, kolki aŭtamabilistaŭ, na ich dumku, udzielničała ŭ akcyi. Nahadajem, arhanizatary akcyi kazali niedzie pra 1600 mašynaŭ.

«Dakładna padličyć składana. Numary mašyn byli „prabityja“ pa bazie i razam z usimi dadzienymi, dyskami z fatahrafijami i videa adpraŭlenyja ŭ rajonnyja DAI Minska. I kožnaja rajonnaja DAI budzie vyklikać „svaich“ parušalnikaŭ.

«U nas jość fota i videa ŭsich prysutnych na akcyi aŭtamabilaŭ. Na ich adlustravanyja i tyja, chto trapiŭ tudy vypadkova. Ale pryciahvacca buduć mienavita parušalniki — tyja, chto metanakiravana spyniaŭsia, stvaraŭ zator, jechaŭ na čyrvonaje śviatło abo pierasoŭvaŭsia pa pałasie dla hramadskaha transpartu. U pieršuju čarhu, viadoma, źvierniem uvahu na ŭlotki i nalepki na mašynach. Zrazumieła, što kali aŭtamabil z takoj nalepkaj spyniŭsia mienavita tam i mienavita tady — sprava nie ŭ tym, što jon „zakipieŭ“. Tym bolš što mnohija takija aŭto adrazu ž zavodzilisia, jak tolki da ich padjazdžaŭ evakuatar», — padkreśliła Žanna Trajno.

Jak raskazali ŭ Dziaržaŭtainśpiekcyi, parušalnikam pahražajuć štrafy.

«Kožnamu kankretnamu vypadku pravavaja acenka budzie dadzienaja asobna, budzie pravodzicca razhlad. I suma štrafu budzie zaležać ad pravaparušeńnia. Tak, jazda pa pałasie dla hramadskaha transpartu — adno pakarańnie, jazda na čyrvonaje śviatło — druhoje, stvareńnie zatoru — treciaje», — patłumačyła Žanna Trajno.

Nahadajem, čaćviora ŭdzielnikaŭ akcyi ŭžo atrymali štrafy ŭ pamiery ad 15 da 20 bazavych vieličyń. Darečy, hrošy na apłatu štrafaŭ im sabrali ŭsim śvietam.

Na prośbu čytačoŭ za tłumačeńniami taho, jak udzielnik akcyi moža i pavinien pavodzić siabie ŭ takoj situacyi, kali jaho vyklikajuć u DAI, Naviny.by źviarnulisia da jurystaŭ.

Jak zajaviŭ kiraŭnik Biełaruskaha Chielsinskaha kamiteta Aleh Hułak, parušeńnie praviłaŭ darožnaha ruchu nie praduhledžvaje «takoha ŭžo strašnaha pakarańnia, kab praz heta rezka admaŭlacca ad prava na vykazvańnie svajho mierkavańnia».

Ahulnyja pravy i svabody nichto nie admianiaŭ, praciahvaje juryst: «Kali vyklikajuć-to pavinnaja być pozva, kali afarmlajuć pakazańni — pavinien być pratakoł z usimi zapoŭnienymi hrafami. Naturalna, što tradycyjna čałaviek moža nie śviedčyć suprać siabie. Taksama nie varta zabyvać, što pavodle ahulnaj pravavoj normy pry lubych kantaktach ź dziaržaŭnymi i niedziaržaŭnymi orhanami hramadzianie mohuć karystacca pravavoj dapamohaj advakataŭ abo inšych pradstaŭnikoŭ. Tamu, kali zachoča, čałaviek, jaki vyrašyŭ źjavicca ŭ DAI, moža ŭziać z saboj advakata ci svajho zakonnaha pradstaŭnika».

Darečy, kali vy ŭsio ž vyrašycie nie źjaŭlacca na hutarku z daišnikami, sprava vašaja. «Adnak, — adznačaje juryst, — u niekatorych vypadkach sprava moža być razhledžanaja i biez prysutnaści abvinavačanaha — i jon u vyniku atrymaje toj ža štraf. Da taho ž, čałaviek moža być padvierhnuty prymusovamu pryvodu».

«Za parušeńnie PDR milicyja ŭ pravie samastojna prymianić pakarańnie — aštrafavać, — raskazaŭ Aleh Hułak. — Ale, jašče nie apłačvajučy štraf, abvinavačvany moža jaho abskardzić u sudzie. Heta, pa-pieršaje, dazvolić, vynieści spravu na publiku, a pa-druhoje, zrobić praceduru bolš abaronienaj i roŭnaj dla bakoŭ».

Darečy, juryst ličyć, što takija vykliki ŭ DAI mohuć być «vymańvańniem» čałavieka dla hutarki z supracoŭnikami KDB: «Takija fakty ŭžo byli. Ale čałaviek zaŭsiody moža admovicca ad takoj razmovy».

Jak zaŭvažyŭ Aleh Hułak, dakazać, što kiroŭca prysutničaŭ u peŭny čas u peŭnym miescy, majučy videa, možna lohka. A voś toje, što aŭtamabilist trapiŭ tudy nie vypadkova, zatrymaŭšysia ŭ zatory, a metanakiravana pryjechaŭ pratestavać — užo składaniej: «Mała što — čałaviek jechaŭ mima i trapiŭ u zator. A kali i dla ŭdziełu ŭ akcyi pryjechaŭ. Ale što jon hetym parušyŭ — pytańnie…».

«Toje, što čałaviek jechaŭ pavolna — nie parušeńnie, tamu što minimalnaja chutkaść na hetym učastku nie ŭstalavanaja. Toje, što čałaviek jechaŭ z uklučanaj avaryjnaj sihnalizacyjaj — taksama nie parušeńnie, — razvažaje juryst. — U pryncypie, udzielnikaŭ akcyi mohuć abaviazać padavać hukavy sihnał, što ŭ nasielenym punkcie, akramia vypadkaŭ, nieabchodnych dla praduchileńnia DTZ, zabaroniena. Ale tam ža amal usie sihnalili, taki šum stajaŭ, što navat na videa składana vyśvietlić, što voś mienavita hety čałaviek sihnalić».

Na dumku śpiecyjalista, akramia parušeńniaŭ PDR udzielnikam akcyi mohuć pasprabavać «upiačatać» jašče što-niebudź. «Tvorčaja fantazija našych pravaachoŭnikaŭ biaźmiežnaja, — adznačaje Aleh Hułak. — Tamu mohuć padvieści heta i pad niesankcyjanavanuju masavuju akcyju pratestu, i pad masavyja biesparadki. Tady aścierahacca varta ŭžo nie tolki štrafaŭ».

Zrešty, dalej razvažać i mierkavać kiraŭnik BCHK nie biarecca.

«Łohika ŭ słužkaŭ pravaparadku moža być samaj roznaj. Chto moh pradkazać, što ŭ ich chopić rozumu ŭdzielnikaŭ mirnaj akcyi 19 śniežnia abvinavacić u masavych biesparadkach i z takimi dokazami dać im takija vialikija terminy? Narmalnaja jurysprudencyja nie mahła hetaha pradkazać! Vielmi časta, na žal, my zmušanyja nie pradbačyć, a adyhryvać ich dziejańni, — kaža Aleh Hułak. — Tamu što

praktyka apošnich hadoŭ pakazvaje, što našy pravaachoŭnyja orhany da svajho adnabokaha prymianieńnia zakona padychodziać nastolki tvorča, što takoje ni ŭ adnu narmalnuju hałavu pryjści prosta nie moža».

BCHK abiacaje, što pasprabuje prapracavać usie mahčymyja varyjanty raźvićcia padziej i najbližejšym časam padrychtuje «pamiatku» dla vyklikanych u DAI z nahody akcyi «Stop-bienzin-4».

Kamientary da artykuła