Letnija pryhody na harnałyžnych kurortach. Što prapanujuć naviednikam «Siličy», «Jakuckija hory» i ich kankurenty?

Letam Minsk taksama pieratvarajecca ŭ kurort.

Siličy

Najbujniejšy, ale i samy darahi biełaruski kurort pracuje napoŭnicu i zimoj, i letam. Tolki ciapier zamiest śniehachodaŭ popytam karystajucca kvadracykły i łyžarolery. Letni adpačynak tańniejšy za zimovy. Prakat miača kaštuje piać tysiač rubloŭ, šezłonha — dziesiać tysiač.

U «Siličy» čaściej za ŭsio pryjazdžajuć kampanijami. Arandavać placoŭku dla mini-futboła, handboła ci inšych hulniaŭ kaštuje 50 tysiač rubloŭ za hadzinu. Adna hulnia ŭ piejntboł (100 šaroŭ) — 40 tysiač rubloŭ. Dla karparatyŭnaha adpačynku možna źniać numary ŭ trochzorkavym hateli ci prestyžnyja dvuch- i čatyrochmiascovyja katedžy.

Jak dabracca? 32 km pa trasie M3 ź Minska ŭ bok Viciebska, na pavarocie na Žodzina — naprava, i 1,5 km da «Siličaŭ». Albo aŭtobusami № 350 i № 400S ad aŭtavakzała «Maskoŭski».

Jakuckija hory

Uletku tut prapanujuć pahulać u haradki i plažny valejboł, pasprabavać siabie ŭ ciry i pakatacca na kvadracykłach. Niekatoryja pasłuhi tańniejšyja, čym u «Siličach». Dla prykładu, placoŭka dla mini-futboła i valejboła kaštuje ŭsiaho 20 tysiač rubloŭ za hadzinu. Piejntboł varta zamaŭlać zahadzia, ale hulnia na 200 šaroŭ budzie kaštavać 55 tysiač rubloŭ. Voś tolki hatela ŭ Jakutach niama.

Jak dabracca? Vyjezd ź Minska pa hrodzienskaj trasie, dalej źviarnuć na darohu Zasłaŭje-Dziaržynsk, a adtul — na Ivianiec. Kala vioski Skirmuntava budzie ŭkazalnik na Jakuty.

Łahojsk

Harnałyžny centr «Łahojsk» prapanuje i haścinicu, i haściavyja domiki. Pole tut kaštuje 50 tysiač rubloŭ, jak i ŭ «Siličach». Kvadracykł — 4 000 rubloŭ za chvilinu, a piejntboł — ad 40 tysiač. Tenisnyja korty — pa 45 tysiač za hadzinu.

Jość cikavyja prapanovy dla amataraŭ vady. Heta i arhanizavanaja rybałka, i prakat katamaranaŭ.

Jak dabracca? 35 km pa trasie M3 ź Minska ŭ bok Viciebska da ŭkazalnika «Harnałyžny centr «Łahojsk».

Krutahorje

Nie nadta viadomy park adpačynku znachodzicca niepadaloku ad «Jakuckich hor», u vioscy Piarchurava Dziaržynskaha rajona. Aproč zvyčajnaha cira i prakatu kvadracykłaŭ, tut prapanujuć i ŭnikalnyja atrakcyjony. Naprykład, viarovačny horad — heta svojeasablivaja biaśpiečnaja alternatyva skałałažańniu, tarzanka, prachod pa biervianie, zamacavanamu na vyšyni 6 m.

Jak dabracca? Vyjezd ź Minska pa hrodzienskaj trasie, źviarnuć na darohu Zasłaŭje-Dziaržynsk, paviarnuć naleva kala vioski Piarchurava.

Kamientary da artykuła