Kudryn atrymaje ŭznaharodu za abaronu rasijskich ŚMI ŭ Biełarusi
Staršynia Sajuza žurnalistaŭ Rasii (SŽR) Usievaład Bahdanaŭ hatovy ŭručyć kiraŭniku Minfina RF Alaksieju Kudrynu za abaronu intaresaŭ rasijskich ŚMI ŭ Biełarusi hanarovy znak «Za zasłuhi pierad žurnalisckaj supolnaściu».
«Ja prosta hanarusia našym uradam, što jany mohuć prymać takija miery — heta realnaja abarona intaresaŭ hramadstva, kab naša hramadstva viedała, što adbyvajecca ŭ Biełarusi. Heta abarona statusu žurnalista», — zajaviŭ Bahdanaŭ RIA Novosti.
Raniej Kudryn skazaŭ žurnalistam, što «ŭrad RF niepakojać miery administracyi Biełarusi pa strymlivańni abo abmiežavańni srodkaŭ masavaj infarmacyi z Rasii». Pavodle jaho słoŭ, kali ŭłady Biełarusi buduć praciahvać naciskać na rasijskija ŚMI, Rasija moža abmiežavać kredytnuju padtrymku hetaj krainy.
Na dumku staršyni SŽR,
u Biełarusi «staŭleńnie da žurnalistyki, jak u nas u Savieckim Sajuzie było 25 hadoŭ tamu». «Jany ličać, što žurnalisty — prapahandysty, pavinny viedać svajo miesca, a heta niapravilny punkt hledžańnia», — skazaŭ jon.
Nahadajem, 27 maja na naradzie ab situacyi na spažyvieckim i valutnym rynku Biełarusi Alaksandr Łukašenka zapatrabavaŭ zakryć šerah srodkaŭ masavaj infarmacyi, u tym liku rasijskich, faktyčna abvinavaciŭšy ich u nahniatańni ŭ krainie ažyjatažnaha popytu na valutu i tavary.
«Bolš za ŭsio isteryi ŭ rasijskich srodkach masavaj infarmacyi, — zajaviŭ Łukašenka. — Ja naziraju i za našymi, pierš za ŭsio zamiežnymi, jakija tut dziakujučy Administracyi prezidenta stali panujučymi srodkami masavaj infarmacyi, i za zamiežnymi. Na druhim miescy — našy, jakija vydajucca tut. Ja ich nie nazyvaju, kab nie stvarać im rejtynh, ale zrabicie ŭsio, kab hetyja ŚMI bolš nie prysutničali na našaj terytoryi». «I nie tamu, što my chočam zakryć rot. Nie, — praciahnuŭ kiraŭnik dziaržavy. — Padkreślivaju: ja za imi ŭvažliva naziraŭ, uvieś ažyjataž pačaŭsia adtul».
Andrej Sierada, BiełaPAN.