Admoŭnaje salda źniešniaha handlu pieravysiła $2,8 młrd

U studzieni-krasaviku 2011 hoda admoŭnaje salda źniešniaha handlu tavarami i pasłuhami pavodle danych Nacbanka dasiahnuła 2 młrd. 800,4 młn. dołaraŭ, paviedamlaje Nacyjanalny statystyčny kamitet Biełarusi. Za studzień-krasavik 2010 hoda admoŭnaje salda składała 1 młrd. 345,4 młn. dołaraŭ, za studzień-sakavik 2011 hoda — 2 młrd. 354,5 młn. dołaraŭ.

Abjom źniešniaha handlu tavarami i pasłuhami za studzień-krasavik skłaŭ 28 młrd. 578 dołaraŭ, što na 53,8% bolš, čym u studzieni-krasaviku 2010 hoda, u tym liku ekspart — 12 młrd. 888,8 młn. (na 49,3% bolš), impart — 15 młrd. 689,2 młn. (na 57,6% bolš).

Pavodle mietadałohii handlovaha bałansu, jakaja ŭličvaje danyja Dziaržaŭnaha mytnaha kamiteta, u studzieni-krasaviku 2011 hoda admoŭnaje salda źniešniaha handlu tavarami skłała 3 młrd. 751,3 młn. dołaraŭ (u studzieni-krasaviku 2010 hoda — minus 2 młrd. 24 młn.).

Asnoŭnymi krynicami farmiravańnia admoŭnaha salda za studzień-krasavik 2011 hoda źjaŭlajucca ekspartna-impartnyja apieracyi z pramiežkavymi tavarami (enierhanośbity, syravina, materyjały i kamplektujučyja). Ekspart pramiežkavych tavaraŭ skłaŭ 7 młrd. 848,8 młn. dołaraŭ, pavialičyŭšysia na 69,4%, impart — 11 młrd. 7 młn. (na 60,5% bolš).

Na enierhietyčnyja tavary prypadała 48,7% vartasnaha abjomu ekspartu i 52,8% impartu pramiežkavych tavaraŭ. Na źniešni rynak ich pastaŭlena na 3 młrd. 822,8 dołaraŭ, što ŭ 2,1 razu bolš, čym u studzieni-krasaviku 2010 hoda. Impart enierhietyčnych tavaraŭ skłaŭ 5 młrd. 811,1 młn. dołaraŭ, što ŭ 1,8 razu bolš za ŭzrovień studzienia-krasavik 2010 hoda. Salda źniešniaha handlu enierhanośbitami skłałasia admoŭnaje ŭ abjomie 1 młrd. 988,3 młn. dołaraŭ (u studzieni-krasaviku 2010 hoda — minus 1 młrd. 438,6 młn.)

Vieličynia admoŭnaha salda handlu spažyvieckimi tavarami ŭ studzieni-krasaviku 2011 hoda dasiahnuła 641,9 młn. dołaraŭ (u studzieni-krasaviku 2010 hoda — plus 28,8 młn. dołaraŭ).

Źniešni handal charčovymi tavarami ŭ studzieni-krasaviku 2011 hoda charaktaryzavaŭsia stanoŭčym salda ŭ 500,7 młn. dołaraŭ. U paraŭnańni sa studzieniem-krasavikom 2010 hoda hety pakazčyk pavialičyŭsia na 59,3 młn. dołaraŭ.

Kamientary da artykuła