Uładzimir Patupčyk abrany namieśnikam staršyni Savieta Respubliki

Uładzimir Patupčyk 17 červienia abrany namieśnikam staršyni Savieta Respubliki. Za jaho kandydaturu prahałasavali ŭsie 52 parłamientaryi, jakija ŭdzielničajuć u siońniašnim pasiadžeńni.

Abrańniu Patupčyka papiaredničała hałasavańnie pa vyzvaleńni ad pasady namieśnika staršyni Leanida Krupca. Za heta rašeńnie členy vierchniaj pałaty taksama prahałasavali adnahałosna.

Krupiec zastajecca členam Savieta Respubliki. Jon uvajšoŭ u skład kamisii pa zakanadaŭstvie i dziaržaŭnym budaŭnictvie.

Uładzimir Patupčyk naradziŭsia ŭ 1958 hodzie ŭ Śvietłahorsku (Homielskaja vobłaść). U 1980 hodzie skončyŭ Biełaruski politechničny instytut, u 2002-m — Rasijskuju akademiju dziaržaŭnaj słužby pry prezidencie RF. U 1993–1998 hadach — namieśnik staršyni, pieršy namieśnik staršyni Śvietłahorskaha harvykankama. U 1998–2001 hadach — staršynia kamiteta pa ekanomicy i rynačnych adnosinach Homielskaha abłvykankama. 12 studzienia 2001 hoda prezident Biełarusi daŭ zhodu na jaho pryznačeńnie staršynioj Mazyrskaha harvykankama. 27 listapada 2001 prezident daŭ zhodu na pryznačeńnie namieśnikam staršyni Homielskaha abłasnoha vykanaŭčaha kamiteta. 27 žniŭnia 2004 hoda pryznačany pamočnikam prezidenta — hałoŭnym inśpiektaram pa Minsku. Z maja 2006 hoda — ministr pracy i sacyjalnaj abarony. 4 červienia 2009 hoda pryznačany namieśnikam prem'jer-ministra.

Kamientary da artykuła