Šachmatny hod u Biełarusi
Zastoj u šachmatnym žyćci syšoŭ kolki hadoŭ tamu, i ŭ 2006 h. padziejaŭ nie brakavała. Časam hulcam navat vypadaŭ vybar: ci to dahulvać pieršuju lihu ŭ Miensku, ci to skakać na tempaturnir u Asipovičy.
Zastoj u šachmatnym žyćci syšoŭ kolki hadoŭ tamu, i ŭ 2006 h. padziejaŭ nie brakavała. Časam hulcam navat vypadaŭ vybar: ci to dahulvać pieršuju lihu ŭ Miensku, ci to skakać na tempaturnir u Asipovičy.
Prapanuju čytačam «Kaisy» ŭłasny pozirk na vyniki šachmatnaha hodu. Zaprašaju intarasantaŭ vysoŭvać alternatyŭnyja versii, pahatoŭ Federacyja šachmat (u adroźnieńnie ad šašačnaj) redka «pahladam akidvaje šlach».
Šachmatyst hodu: Siarhiej Žyhałka. 17‑hadovy junak nia tolki staŭ hrosmajstram, ale i vyjhraŭ Čempijanat Eŭropy (U‑18), u t.ł. pa chutkich šachmatach i pa blicu. Zasłuhoŭvajuć uchvały i vystup Viačasłava Dydyški na pieršynstvie krainy (10 z 13), i debiuty Alaksandry Šarovaj u Vyšejšaj lizie (7,5 z 11), Jurja Cichanava na Suśvietnaj alimpijadzie ŭ Turynie (4 z 6).
Trener hodu: Raman Fiadosienka z Mazyra. Hety małady čałaviek, adkryvalnik talentu Leny Tairavaj, pryvioŭ dačku Rahniedu da pieramohi ŭ pieršynstvie Biełarusi siarod dziaŭčatak da 8 hadoŭ. Nie jaho vina, što Rahnieda nie pajechała na batumski Čempijanat śvietu ŭ kastryčniku — u razhar kanfliktu Hruzii z Rasiejaj.
Sudździa hodu: Źmicier Łybin. Mižnarodny arbitar udała «razruliŭ» vyšejšuju lihu Čempijanatu Biełarusi ŭ sakaviku i «Inaŭtamarkiet‑oŭpen»‑2 u lipieni.
Klub hodu: biassprečna, mienskaja «Viaśnianka», supołka, što 4‑y raz zapar vyjhrała nacyjanalny čempijanat. Pažarnik Leanid Školnikaŭ (staršynia) i hrosmajstar Siarhiej Azaraŭ skaaperavalisia ź vice‑čempijonam krainy Alaksiejem Fiodaravym. Na pieršynstvie Eŭropy (kastryčnik, Aŭstryja) kamanda začapiłasia za 6‑ie miesca z 56 — biesprecedentny vynik.
Vydaviec hodu: Vadzim Žyłko z Łuninca. Paet‑historyk małymi siłami ciahnie kampazytarski biuleteń «Albino», a ŭ 2006 h. padrychtavaŭ 6 numaroŭ dadatku «Albino‑plus» z razmaitymi artykułami dla amataraŭ litaratury i praktyčnaj hulni. Darečy, jon — adziny biełarus, jaki šmat hadoŭ vystupaje ekspertam u konkursach maskoŭskaha časopisu «64».
Šachmatny sajt hodu: brestchess.narod.ru. Bieraściejcy, nie pierahružajučy naviednikaŭ infarmacyjaj, pastaŭlajuć dastupny i daścipny źmiest: asabliva padkupili «Šachmaty dla čajnikaŭ». Na žal, centralny resurs bychess.info u 2006 h. krychu zbaviŭ abaroty, a «Žanočyja šachmaty» ŭvohule začynilisia.
Straty hodu: Pamierli Ratmir Chołmaŭ i David Branštejn, hrosmajstry, jakija nie naradzilisia ŭ Biełarusi, ale doŭha žyli tut, upłyvali na jaje šachmatny landšaft.
Nu i… burbałka hodu. Nieadbyty klubny čempijanat krainy siarod žančyn, pra jaki zhadvałasia ŭ «NN» № 45, 2006.
Volf Rubinčyk
❏
Jak by vy zhulali?
V. Vołčak, A. Symanovič, 2006. Mat za 2 chady.