Maryna Šubič, paciarpiełaja u terakcie, dziela dziaržekzamienaŭ admoviłasia ad mylicaŭ

Dziaŭčyna pieraniesła niekalki apieracyj, ale damahłasia pastaŭlenaj mety i na abaronu dypłoma pryjšła sama.

Dziaŭčyna pieraniesła niekalki apieracyj, ale damahłasia pastaŭlenaj mety i na abaronu dypłoma pryjšła sama.

- I adnakurśniki, i nastaŭniki vielmi ŭzradavalisia, kali mianie ŭbačyli, sustreli śviatočna, abdymali, - uśmichajecca 23-hadovaja Maryna, jakaja da hetaha času znachodzicca ŭ minskim špitali. Paśla vybuchu na stancyi mietro «Kastryčnickaja» dziaŭčyna pieražyła trepanacyju čerapa, častkovuju stratu zroku. Paśla apieracyi na nazie Maryna ŭstała na mylicy. Vykładčyki, daviedaŭšysia pra trahiedyju, pryniali rašeńnie prymać u Maryny dziaržekzamieny ŭ balničnaj pałacie.

Ale mužnaja studentka pastaviła sabie metu - pryjechać na abaronu dypłoma i dziaržekzamieny va ŭniviersitet.

- Pieršy krok biez mylicaŭ ja zrabiła tydzień tamu. Spačatku pieražyvała: jak heta ja bieź ich abydusia? - pryznałasia Maryna. - Ale ŭsio atrymałasia dziakujučy padtrymcy i lubovi maich baćkoŭ i siabroŭ. Bieź ich b ja nie spraviłasia!

Daktary na niekalki hadzin adpuścili Marynu ź lakarni 22 červienia, i baćki pryvieźli dačku ŭ ekanamičny ŭniviersitet. Dziaŭčyna ŭdziačnaja svaim siabroŭkam, jakija dapamahli joj aformić dypłomnuju pracu. Bo ŭ toj trahičny viečar 11 krasavika Maryna viezła ŭ instytut fłešku z treciaj častkaj dypłoma. Padčas vybuchu fłeška złamałasia, zastaŭsia razdrukavany varyjant dypłoma, jaki siabroŭki złučyli ź dźviuma pieršymi častkami.

- Ja chvalavałasia, ale adkazała na ŭsie pytańni, abaraniła dypłom, i vykładčyki pastavili mnie vaśmiorku i pavinšavali z prysvajeńniem kvalifikacyi «ekanamist».

Praz tydzień daktary nakiroŭvajuć Marynu ŭ Aksakaŭščynu dla dalejšaha ŭznaŭleńnia.

Dziaŭčyna pastaviła pierad saboj novuju metu - treniravać vočy, kab pačać bačyć na adlehłaści niekalki mietraŭ.

Kamientary da artykuła