Turemnyja daktary prapanujuć špitalizavać A.Kazulina
Stan eks-kandydata ŭ prezydenty paśla haładoŭki kudy ciažejšy, čym mierkavali.
Alaksandar Kazulin zaklikaŭ apazycyju admovicca ad udziełu ŭ miascovych vybarach, jakija, jak jon ličyć, prachodziać z parušeńniem zakonu. Tym časam u samoha palityka pahoršyłasia zdaroŭje
28 śniežnia z Alaksandram Kazulinym ŭ kalonii sustreŭsia jahony advakat Ihar Rynkievič. Sustreča doŭžyłasia dźvie hadziny. Hałoŭnyja naviny tyčacca paharšeńnia zdaroŭja palityka j jahonych zajavaŭ pra vybary ŭ miascovyja saviety.
Ihar Rynkievič paviedamiŭ, što vychad Alaksandra Kazulina z haładoŭki akazaŭsia bolš ciažki, čym mierkavałasia. Pavodle advakata, turemnyja daktary vykazvajucca za špitalizacyju Alaksandra Kazulina.
(Rynkievič: ) «U jaho aciokavaść cieła, koliki. Jon maje bolej lažać. Raniej zdavałasia, što jon nabiraje vahu, ale nabirańnie vahi j aciokavaść — heta roznyja rečy. Mahčyma, što nie adnaviłasia praca peŭnych orhanaŭ — mahčyma, nyrak. Ci niešta inšaje niedapracoŭvaje, adsiul takija tryvožnyja sypmtomy».
Alaksandar Kazulin, adnak, pakul admaŭlajecca ad špitalizacyi. Palityk patłumačyŭ advakatu, što źmiaščeńnie jaho ŭ mienski turemny špital źviazana z karantynam dy inšymi režymnymi dziejańniami, padčas jakich ciažka pravodzić kurs vychadu z haładoŭki. Žonka palityka Iryna Kazulina ŭsio ž raźličvaje ŭhavaryć muža lehčy ŭ špital.
(Kazulina: ) «Mnie b, viadoma, było spakajniej, kab jon byŭ pad nahladam daktaroŭ. Ale sam Alaksandar kaža, što spravicca samastojna».
Alaksandar Kazulin prasiŭ advakata pieradać na volu jahonyja mierkavańni adnosna padziejaŭ u krainie. Hetak, były kandydat na prezydenta zaklikaje demakratyčnyja siły zajavić pra niedavier Centralnaj vybarčaj kamisii, jakaja, na jaho dumku, nia zdolnaja harantavać zakonnych vybaraŭ, — i spynić vybarčuju kampaniju.
(Rynkievič: ) «Jon kaža, što niemahčyma daviarać CVK, u jakuju ŭvachodziać Lidzija Jarmošyna i Mikałaj Łazavik».
Pavodle Alaksandra Kazulina, apazycyja maje adnavić udzieł u vybarach tolki paśla taho, jak ułada vykanaje šerah patrabavańniaŭ dziela demakratyzacyi palityčnaha žyćcia j vybarčaha zakonu.
Nie abyšoŭ uvahaj Alaksandar Kazulin i hazavaha kanfliktu biełaruskich i rasiejskich uładaŭ. Pavodle jaho, u hetym kanflikcie biełaruskaj apazycyi treba skazać svajo słova.
(Rynkievič: ) «Biełaruskaja apazycyja pavinna prapanavać svaju prahramu dobrasusiedzkich i ŭzajemavyhadnych dačynieńniaŭ z Maskvoj i rasiejskimi ekanamičnymi partnerami».
Alaksandru Kazulinu dazvolili doŭhaterminovaje spatkańnie sa svajakami ŭ kancy studzienia 2007 hodu, paviedamiŭ advakat.
Nahadajem, były kandydat na prezydenta Alaksandar Kazulin asudžany na piać z pałovaj hadoŭ źniavoleńnia pavodle abvinavačańnia ŭ chulihanstvie j arhanizacyi vuličnych biesparadkaŭ. «Mižnarodnaja amnistyja» pryznała Kazulina viaźniem sumleńnia. U kalonii Alaksandar Kazulin 53 dni trymaŭ palityčnuju haładoŭku pratestu, u vyniku jakoj damohsia abmierkavańnia biełaruskaha pytańnia ŭ Radzie biaśpieki AAN.