Źmicier Daškievič: "Ad "NN" cenzary pakinuli adnu staronku "Hazetka dzietkam"
List z-za krataŭ
Pryjechała siudy niejkaja delehacyja, katoraja, abčytaŭšysia materyjałaŭ pra vyzvaleńnie Mikoły, vyrašyła navieści paradak na zonie. Nu i daŭšy pa šapkam niekatorym, uzialisia za mianie.
Palitviazień dasłaŭ čarhovy list sa škłoŭskaj kalonii.
«Na karancinie siadziać pa dva tydni. Ale možna ŭziać i ŭsie navahodnija śviaty tut. Umovy takija, što turma zdajecca prosta sanatoryjem. Uvieś dzień haniajuć na narady (mieści, hruzić, karmić), pastrajeńni z pravierkami i h.d. Času ledź znachodžu na toje, kab pačytać trochi Bibliju, dy paśpieć adkazać na listy, katoryja pad śviatłom vuličnaha lichtara adpisvaju da hadzinaŭ 24‑ch. A ŭ 4.30 padymajusia. Padjom, praŭda, u 5, ale tady nie paśpiavaješ papić harbaty, bo ŭ 5.15 na paru hadzinak, u luboje nadvorje, vyhaniajuć na vulicu, kab prybrać pamiaškańnie. Pryborki, biezumoŭna, dobra, ale jak ich tut robiać pa try razy na dzień, dyk prosta durejuć usie.
Na pačatku hetaha tydnia, jak kažuć, pryjechała siudy niejkaja delehacyja, katoraja, abčytaŭšysia materyjałaŭ pra vyzvaleńnie Mikoły, vyrašyła navieści paradak na zonie. Nu i daŭšy pa šapkam niekatorym, uzialisia za mianie. Adzin kiraŭničok miascovy zajaviŭ, što kali ja nie spyniu ahitacyju, pasadziać mianie ŭ adzinočku, a jašče mohuć navat nakinuć paru hadkoŭ. Kali ja pačaŭ tłumačyć jamu, što razmaŭlaju z zekami na chryścijanskija temy, dyk jon pačyrvanieŭ ad złości na maju niezhavorlivaść, dakałupaŭsia da majoj ciopłaj biezrukkavački i vynies mnie dva papiaredžańni. Siońnia mnie šapnuli, što nijakija ITRy i UDO mnie nie pahražajuć.
Učora atrymaŭ «Našu Nivu» – ad hazety cenzary pakinuli tolki adnu staronku, «hazetku dzietkam»».