Uspłyła instrukcyja pa dyskredytacyi prahramy imia Kalinoŭskaha
U ruki kiraŭnika prahramy Jana Malickaha patrapiŭ list z padrabiaznym planam dyskredytacyi. Samoha pana Malickaha mierkavałasia spakusić prastytutkaj.
Dyrektar Centru uschodnich daśledavańniaŭ Varšaŭskaha universytetu, kiraŭnik stypendyjalnaj prahramy imia Kastusia Kalinoŭskaha doktar Jan Malicki skazaŭ našamu radyjo, što apošnim časam mieli miesca sproby dyskredytavać prahramu. Siarod inšaha ŭ ruki spadara Malickaha patrapiŭ list, dzie padrabiazna apisvajecca plan takoj dyskredytacyi.
Jan Malicki kaža, što byŭ uražany jahonym źmiestam.
(Malicki: ) “Hety list vyhladaje jak instrukcyja dyskredytacyi. Tam punktaŭ siem. Pryčym pieršy tyčycca dyrektara prahramy, heta značyć mianie i tam havorycca prama, prabačcie za cytatu, “uziać prastytutku, jakaja b mieła seksualny kantakt z Malickim i takim čynam sabrać na jaho kampramat”. Kaniešnie, tut nie ŭ majoj asobie sprava, ale ŭ dyskredytacyi prahramy. Tam jość mianuški, ale i sapraŭdnyja proźviščy biełaruskich studentaŭ, jakija ja vyrašyŭ nie padavać, bo toje, što jany jość u hetym liście, nie značyć, što heta pravakatary”.
Jan Malicki raskazaŭ taksama pra sproby nieviadomych ludziej, jakija raptam źjavilisia ŭ internatach, padbuchtorvać studentaŭ da pratestaŭ suprać kiraŭnictva prahramy ŭ spravie raźmierkavańnia, varunkaŭ navučańnia, pry tym, što stypendyjanty prahramy Kalinoŭskaha majuć, jak kaža spadar Malicki, “u dva razy lepšyja varunki, čym polskija studenty”.
(Malicki: ) “Jak skazaŭ Alaksandar Milinkievič, ź jakim ja razmaŭlaŭ pra ŭsie hetyja spravy, “heta tolki paćviardžaje, jakoj vialikaj pahrozaj dla ŭładaŭ źjaŭlajecca prahrama Kalinoŭskaha, adukacyja dla biełaruskich maładych elitaŭ”. Ja absalutna zhodny z hetym".
Jan Malicki raskazaŭ taksama, što častka studentaŭ prahramy nie naviedvajuć lekcyi ŭ VNU, kudy jany byli raźmierkavanyja. Niekatoryja, nie dačakaŭšysia vakacyjaŭ, pajechali ŭ Biełaruś, što, pavodle administracyjaŭ hetych VNU, źjaŭlajecca niedapuščalnym i moža pryvieści da adličeńnia, a značyć i pazbaŭleńnia stypendyi, praduhledžanaj prahramaj.
Siaržuk – stypendyjat prahramy imia Kalinoŭskaha i student adnoj z varšaŭskich VNU kaža, što viedaje biełaruskich studentaŭ, jakija patrapili ŭ Polšču ŭ miežach prahramy, ale nia chočuć vučycca.
(Siaržuk: ) “Tak, takoje jość. Ale heta było vidać jašče letam u časie navučańnia polskaj movie - chto choča vučycca, a chto nie. Toje, što niechta byŭ na płoščy ci maje dačynieńnie da demakratyčnaha ruchu, nia značyć, što hety čałaviek abaviazkova budzie i choča vučycca”.
Bolšaść studentaŭ, u tym liku i ŭsie biełarusy ŭ VNU Siaržuka, adnak, staranna vučacca.
Jan Malicki kaža, što scenar mahčymaj dyskredytacyi braŭsia pad uvahu, mienavita tamu pra ŭsie sproby takich zachadaŭ vyrašana nieadkładna infarmavać medyi.
(Malicki: ) “Ad pačatku ŭsie brali pad uvahu toje, što siarod takoj kolkaści studentaŭ mohuć apynucca ludzi, jakija nia majuć na mecie atrymać adukacyju i słužyć demakratyi, tolki buduć zajmacca słužbaj biełaruskim specsłužbam”.