Pa vynikach pieršaha dnia «Bazaru» lidziruje pradstaŭnica Biełarusi Alena Łanskaja

Pradstaŭnica Biełarusi Alena Łanskaja lidziruje pa vynikach pieršaha dnia XCh Mižnarodnaha konkursu vykanaŭcaŭ estradnaj pieśni, jaki prachodzić u ramkach fiestyvalu «Słavianski bazar u Viciebsku».

Pieršaje konkursnaje vystupleńnie dvaccaci maładych vykanaŭcaŭ z dvaccaci krain śvietu adbyłosia viečaram 11 lipienia ŭ Letnim amfiteatry. U supravadžeńni fanahramy «minus adzin» kankursanty vykanali pieśniu kampazitara svajoj krainy na rodnaj movie.

25-hadovaja biełaruskaja ŭdzielnica vychodzić na scenu pad druhim numaram, jaki vypaŭ joj pa vynikach losavańnia. Za pieśniu «Nieba viedaje», jakuju Łanskaja vykanała na ruskaj movie, jana nabrała 89 bałaŭ z 90 mahčymych. Usie členy žury na čale ź ministram kultury Biełarusi Paŭłam Łatuškam pastavili joj najvyšejšy bał — 10. Adzinuju «dziaviatku» pradstaŭnicy Biełarusi pastaviła papularnaja śpiavačka ź Sierbii, uładalnica Hran-pry konkursu «Viciebsk-1997» Śviatłana Słaŭkovič.

Z adryvam u adzin bał uśled za Łanskoj pa vynikach pieršaha konkursnaha dnia iduć čech David Dejł i ŭkrainiec Uładzimir Kvaśnica (pa 88 bałaŭ). Na trecim miescy — pradstaŭnica Litvy Ruta, jakaja nabrała 86 bałaŭ. Adnolkavaja kolkaść bałaŭ, 83, adrazu ŭ čatyroch kankursantaŭ: bałharyna Dzimitra Atanasava, rasijanki Mary Karnie, małdavanki Kryściny Skarłat i kazacha Ališera Karymava.

Dalej miescy ŭ konkursnaj tablicy raźmierkavalisia nastupnym čynam: Dajnis Skutelis (Łatvija, 82 bała), Narek Makaran (Armienija, 80 bałaŭ), Bajan Stojkaŭ (Makiedonija) i Małhažata Hłuŭka (Polšča) — pa 78 bałaŭ, Andreja Žymanieva (Słavakija, 77 bałaŭ), Marharyta (Estonija) i Źvijad Abašydze (Hruzija) — pa 75 bałaŭ, Anis Batysta (Kuba, 74 bała), Maryja (Rumynija, 72 bała), Dženi Čaci (Italija) i Tachmina Nijazava (Tadžykistan) — pa 69 bałaŭ. Zamykaje tablicu (z 68 bałami) pradstaŭnica Azierbajdžana Ajnišan.

Pa reakcyi amfiteatra było zrazumieła, chto źjaŭlajecca favarytam u publiki. Hledačoŭ uraziŭ mocny hołas salista Danieckaha nacyjanalnaha akademičnaha ŭkrainskaha muzyčna-dramatyčnaha teatra Uładzimira Kvaśnicy, jaki vykanaŭ na rodnaj movie ramans «Čornyja brovy».

Vielmi cioła zała sustreła samaha starejšaha ŭdzielnika konkursu, 33-hadovaha hruzina Źvijada Abašydze. Jon kranuŭ usich vydatnym vykanańniem znakamitaj «Suliko».

Zapomniŭsia hledačam i łatyš Dajnis Skutelis, jaki vyjšaŭ na scenu ŭ vobrazie Kvazimody i vykanaŭ aryju hetaha hieroja ź miuzikła «Notr-Dam de Pary».

22-hadovaja kubinka Anis Batysta zaviaršyła svoj vychad na scenu na patryjatyčnaj nocie: «Jak i maja kraina, ja takaja ž maleńkaja, ale vielmi hanarlivaja i mocnaja!».

Siońnia ŭdzielniki konkursu buduć vykonvać estradnuju pieśniu kampazitara słavianskaj krainy, na adnoj sa słavianskich moŭ, u supravadžeńni Nacyjanalnaha kancertnaha arkiestra Biełarusi pad kiraŭnictvam Michaiła Finbierha. Bały, nabranyja ŭ druhi dzień, buduć sumavacca z atrymanymi napiaredadni.

Uładalniki Hran-pry, a taksama pieršaj, druhoj i treciaj premij i śpiecyjalnych uznaharod konkursu «Viciebsk-2011» stanuć viadomyja ŭ sieradu, 13 lipienia, na cyrymonii ŭznaharodžańnia.

Kamientary da artykuła