Masavaje atručeńnie biełaruskich dziaciej u Bałharyi adbyłosia praź niajakasnuju vadu

Pra heta paviedamlaje internet-resurs «NewsBG.ru — bałharskija naviny pa-rusku» sa spasyłkaj na akcyjaniernaje tavarystva «VIK-Burhas», jakoje zajmajecca vodazabieśpiačeńniem. Incydent adbyŭsia ŭ hateli «Hryn Park» u Kitenie (paŭdniovaja častka čarnamorskaha ŭźbiarežža Bałharyi).

Pavodle śćviardžeńnia «VIK», hety hatel aficyjna padklučany da centralnaha vodazabieśpiačeńnia horada Kitena, ale jon taksama «vykarystoŭvaŭ nierehłamientavanuju krynicu vodazabieśpiačeńnia», jakaja, jak miarkujecca, i źjaviłasia pryčynaj zaražeńnia bakteryjalnaj infiekcyjaj. Pres-sakratar «VIK» zajaviŭ, što «kali pryčynaj atručeńnia źjaŭlajecca pitnaja vada, jakaja padajecca centralizavana, to anałahičnyja prablemy pavinny być va ŭsich žycharoŭ haradoŭ Kiten i Prymorska».

U rajonnaj inśpiekcyi achovy zdaroŭja Burhasa kanstatavali, što «pryčynaj kišečnaj infiekcyi stała drennaja pitnaja vada». Hałoŭny dziaržaŭny inśpiektar achovy zdaroŭja Anhieł Kunčaŭ paćvierdziŭ, što «ŭłaśnik hatela, u jakim adpačyvali dzieci, niepravamierna padklučaŭ vodapravodnyja truby hatela da nierehłamientavanaj krynicy vady». Pravierka taksama vyjaviła niezakonnaje pavieličeńnie kolkaści miescaŭ u hateli, adsutnaść miedycynskaha absłuhoŭvańnia i najaŭnaść praterminavanych praduktaŭ charčavańnia, dadaŭ Kunčaŭ. 13 lipienia buduć hatovyja vyniki ŭziatych analizaŭ, jakija pakažuć sapraŭdnuju krynicu zaražeńnia.

Nahadajem, u hateli «Hryn Park» u Kitenie adpačyvaje try hrupy biełaruskich dziaciej ahulnaj kolkaściu kala 130 čałaviek va ŭzroście da 18 hadoŭ. Charčavańnie ažyćciaŭlajecca pa pryncypie «ŭsio ŭklučana». Tym nie mienš, vychavalniki śćviardžajuć, što nie ŭsim dzieciam była dadziena pitnaja vada.

11 lipienia ŭ biełaruskaje pasolstva pastupiła infarmacyja pra masavaje atručeńnie dziaciej. Pavodle danych dypłamataŭ, pik zachvorvańnia pryjšoŭsia na niadzielu, 10 lipienia. Usiaho ŭ toj ci inšaj stupieni zachvareli prykładna ad 70 da 80% ad ahulnaha liku biełaruskich dziaciej. Miedycynskuju dapamohu akazvali ŭračy, vyklikanyja biełaruskaj strachavoj kampanijaj «TASK», a taksama ŭrač, jaki supravadžaŭ adnu z hrup biełaruskich dziaciej. Zachvarełym byli dadzieny tabletki, zrobleny ŭkoły, niekatorym pastaŭleny kropielnicy. Dziakujučy svoječasovaj miedycynskaj dapamozie ŭdałosia paźbiehnuć špitalizacyi dziaciej.

Pry hetym byli špitalizavany kala saraka dziaciej z Rasii i Ukrainy, jakija atrucilisia.

Kamientary da artykuła