Što za rezidencyja budujecca na bierazie Minskaha mora?

12.07.2011 / 16:12

Vital Nieścieraŭ

dapoŭniena

Nasuprać uradavaj rezidencyi «Zasłaŭje» budujecca zahadkavy žyły kompleks.

Nasuprać uradavaj rezidencyi «Zasłaŭje» budujecca zahadkavy žyły kompleks.

U pieršy raz da temy ŭradavych rezidencyj «Naša Niva» źviarnułasia hod tamu. U artykule «Dzie žyvie Łukašenka?» my naličyli ź dziasiatak «stavak» vykanaŭčaj ułady, raskidanych pa ŭsioj krainie. Jašče adnu, adzinaccatuju, pavinien byŭ pabudavać na terytoryi Biełaviežskaj puščy Juryj Čyž sa svajoj kampanijaj «Trajpł».

Prajšoŭ hod. Minuli prezidenckija vybary, Biełaruś trapiła ŭ ekanamičny kryzic, a rezidencyi tym časam… pačali množycca. Nie paśpieła nasielnictva abmierkavać budaŭnictva jašče adnaho budynka dla vysokapastaŭlenych naviedniaŭ (miž inšym, dvanaccataha) na Brasłaŭskich aziorach, jak vyśvietliłasia, što na padychodzie i čarhovaja budoŭla! Padrychtoŭčyja pracy raspačalisia ŭ stalicy na ŭčastku pamiž vulicaj Arłoŭskaj i praśpiektam Pieramožcaŭ.

A tydzień tamu čytač ź Minskaha rajona dasłaŭ infarmacyju z-nad Minskaha mora:

«U nas štości budujecca. Usie kažuć, što heta novyja Drazdy.

Nievialiki taki spalny rajon z 5 domikaŭ. Try vialikija budynki. I dźvie mienšyja chatki. A taksama ciaplica, schovišča dla harodniny, łaźnia ahulnaja ź vialikim basiejnam + łaźnia mienšaja. Taksama budaŭniki raskazvajuć, što budujecca fizkulturna-azdaraŭlalny kompleks, niekalki štuk barbiekiu, niekalki haražoŭ, chatki achovy. Nu i drabnicy: pompavaja, ačyščalnaja, valjery dla sabak, fantany, elektrapadstancyja, hienieratar, trochmietrovy płot…

Znachodzicca ŭsio heta na procilehłym bierazie Minskaha mora nasuprać uradavaj rezidencyi».

Rendar žyłoha kompleksu.

Pašpart abjekta.

Ujezd zabaronieny!

Adzin z padjezdaŭ.

Na zadnim płanie - zahadkavyja katedžy.

Vid sa spadarožnika.

Infarmacyja padałasia nam cikavaj.

…Trasa ŭ lesie kala Minskaha mora, za paru kiłamietraŭ da rezidencyi «Zasłaŭje-1». Naprava — ukazalnik da reabilitacyjnaha centra dla vieteranaŭ vajny, naleva — niepaznačanaja daroha. Praskokvajem skryžavańnie, jak raptam zadumvajemsia, moža, pravieryć levy pavarot? Viartajemsia i jedziem pa lasnoj, ale zaasfaltavanaj darozie.

Praz kiłamietr-dva pa pravym baku bačym aharodžu niejkaj budoŭli. Na pašparcie abjekta ŭkazana, što tut uzvodzicca «Žyły kompleks «Uschod». Zamoŭca — SAAT «UschodBud».

Pracy pačalisia 18 sakavika 2009 hoda (ukazany navat dzień!) i musili skončycca ŭ śniežni 2009 hoda. Pakul fatahrafujem pašpart, varoty adjazdžajuć u bok i nasustrač vychodzić achoŭnik. Jon nieahresiŭna, ale nastojliva admaŭlajecca adkazvać na pytańni luboha kštałtu. «Kažuć, tut pablizu rezidencyja budujecca?» — «Źjeździcie ŭ „Drazdy“ i spytajcie». «A tut budaŭnictva ŭžo skončyłasia?» — «Zvanicie zabudoŭščyku». Razumiejem, što ničoha ŭciamnaha achoŭnik nie skaža, i adpraŭlajemsia dalej. Vakoł varotaŭ — niekalki traktaraŭ i dziasiatki bytovak dla rabočych. Značycca, budaŭnictva praciahvajecca.

Nieŭzabavie jašče adno razhalinavańnie. Jak vyśvietliłasia paśla, daroha viadzie prosta da plaža, na jaki ŭśled za nami praskokvaje pradstaŭničy čorny «Miersedes» z elitnym numaram «8000-XX7». A voś naprava — śviežapakładzieny asfalt. Napieradzie da dreva prybita rukapisnaja tablička «ŬJEZD TOLKI HRUZAVYM». Ihnarujem jaje i praz paru sotniaŭ mietraŭ upirajemsia ŭ čarhovyja varoty. Tut achoŭnik jašče bolš nierazhavorlivy. Adzinaje, što daviedajemsia, — heta druhi padjezd da taho samaha žyłoha kompleksa «Uschod».

Pakruciŭšysia vakoł uźbiarežža, tak i nie znachodzim nivodnaha padazronaha miesca. A voś viarnuŭšysia ŭ Minsk, pačynajem navodzić daviedki, što za zahadkavy kompleks «Uschod»?

Jak vyśvietliłasia, kampanija-zabudoŭščyk nie maje ni toje što nivodnaha pabudavanaha abjekta, ale i navat ułasnaha sajta u internecie. I takoj kampanii dazvalajuć budavacca za paru sotniaŭ mietraŭ ad kiraŭnika dziaržavy?!

Adziny ŭkazany na pašparcie abjekta telefonny numar «UschodBuda» ŭvieś čas pracuje ŭ režymie faksa.

Zahadak šmat — naprykład, nidzie i nikoli katedžy ŭ elitnym kompleksie nie vystaŭlalisia na prodaž i nie rekłamavalisia.

Adzinuju infarmacyju pra «Uschod» udałosia znajści na sajcie kampanii «STS-klimat», jakaja nazyvaje siabie hienieralnym prajekciroŭščykam prajekta:

«My źjaŭlajemsia hienieralnym prajektavalnikam žyłoha kompleksu katedžnaha typu sumarnaj płoščaj kala 12 000 m².

Aproč raspracoŭki ŭsich častak prajektnaj dakumientacyi, my taksama ažyćciaŭlajem mantaž sistem aciapleńnia, vientylacyi, kandycyjanavańnia, ciepłazabieśpiačeńnia, aŭtamatyki, dyśpietčaryzacyi, vodazabieśpiačeńnia i kanalizacyi. Na hetym abjekcie my taksama ažyćciaŭlajem poŭny kompleks pracaŭ pa budovie kacielniaŭ i topak.

Akramia hetaha, my vykanali pastaŭku na hety abjekt abstalavańnia dla sistem atapleńnia, vientylacyi, kandycyjanavańnia i kacielnaha abstalavańnia, siarod jakoha: katły Viessmann, vientustanoŭki VBW i DOSPEL, VRV-sistemy Sanyo».

Na spadarožnikavaj mapie ad Google Maps bačna, što miesca budaŭnictva znachodzicca nasamreč nasuprać užo isnujučaj rezidencyi, u adnoj z zatokaŭ Minskaha mora.

Padychodzić pad apisańnie čytača «Našaj Nivy» i vyhlad kompleksu — niekalki katedžaŭ z čyrvonym dacham.

Nazvać sa 100%-aj harantyjaj žyły kompleks «Uschod» čarhovaj uradavaj rezidencyjaj pakul što nielha, ale miesca raźmiaščeńnia (nasuprać isnujučaj rezidencyi), režym abjekta (achova, varoty i trochmietrovy płot) i poŭnaja adsutnaść infarmacyi pra prodaž katedžaŭ jak minimum dajuć padstavy dumać, što infarmacyja, dasłanaja čytačom, praŭdzivaja. Zastajecca daviedacca, chto ź dziaržaŭnych čynoŭnikaŭ budzie vykarystoŭvać žyły kompleks na try siamji.

P. S. Jak vyśvietliłasia, jurydyčny adras zamoŭcy budaŭnictva całkam supałaje z rekvizitami «Minsk-Sici». Heta dadatkovaje paćviardžeńnie viersii čytača «Naša Niva», jaki paviedamiŭ, što novuju rezidencyju buduje zadarma rasijskaja «Itera» ŭ abmien na pradastaŭleńnie vyhadnych učastkaŭ u centry Minska.

Čytajcie taksama:

Kamientary da artykuła