Alaksiej Janukievič: Kali Partyju BNF vysielać z ofisa, u nas jość płan «B»
Partyja BNF šukaje varyjanty arendy ofisa, ale sychodzić ź isnujučaha pamiaškańnia pa dobraj voli nie źbirajecca.
Partyja BNF šukaje varyjanty arendy ofisa, ale sychodzić ź isnujučaha pamiaškańnia pa dobraj voli nie źbirajecca. Pra heta BiełaPAN paviedamiŭ staršynia partyi Alaksiej Janukievič.
«Rašeńnie adstojvać ofis u nas zastajecca. My źviarnulisia z kasacyjnaj skarhaj u Vyšejšy haspadarčy sud, — kaža jon. — My nie sychodzim z hetaha pamiaškańnia, niahledziačy na toje, što daŭno ad nas patrabujuć taho, kab my jaho pakinuli. Na minułym tydni ŭ čaćvier byŭ list ad sudovych vykanaŭcaŭ, jany patrabujuć ciaham tydnia vyzvalić pamiaškańnie, ale my nie źbirajemsia sami adsiul sychodzić, i heta naša rašeńnie zastajecca ćviordym. My tut budziem znachodzicca da toj pary, pakul fizična ŭ nas budzie takaja mahčymaść. Hetaje rašeńnie było pryniataje adrazu, i jano nie źmianiajecca. My, biezumoŭna, spadziajemsia, zaŭsiody jość nadzieja, chacia nie vielmi vialikaja, što Vyšejšy haspadarčy sud pieramienić rašeńnie i nam budzie dazvolena zaklučyć novuju damovu arendy. Ale niezaležna ad rašeńnia sudovaha, niezaležna ad rašeńnia sudovych vykanaŭcaŭ ci inšych instancyj, my budziem tut znachodzicca, pakul takaja mahčymaść budzie. My nie źbirajemsia, jak zajaŭlali, hvałtoŭna ci fizična supraciŭlacca, kali nas adsiul buduć vydalać».
«Što tyčycca zapasnych varyjantaŭ, my ich šukajem. Vielmi šmat vypadkaŭ, kali arandadaŭca dasyłaje nam svoj prajekt damovy arendy i ŭ apošni momant admaŭlajecca. My dumajem, što heta źviazana z peŭnym ciskam, jaki akazvajecca na ułaśnikaŭ pamiaškańnia. My źviartalisia ŭ Kamitet dziaržmajomaści ź listom z prośbaj vydzielić nam pamiaškańnie i ŭčora atrymali adkaz, što na bałansie Dziaržkammajomaści ŭ Minsku — składskija i padvalnyja pamiaškańni i nieabchodnych nam pamiaškańniaŭ jany nie majuć. Ale peŭny reziervovy varyjant u nas jość. Pakul što hety ofis funkcyjanuje tak, jak jon funkcyjanavaŭ zaŭsiody, adnak płan „B“ u nas jość na toj vypadak, kali nas adsiul vydalać», — adznačyŭ Alaksiej Janukievič.
***
Nahadajem, haspadarčy sud Minska 10 maja pryniaŭ rašeńnie vysielić Partyju BNF, hramadskaje abjadnańnie «BNF «Adradžeńnie», a taksama ich minskija haradskija i abłasnyja struktury sa staličnaha ofisa pa praśpiekcie Mašerava, 8. 21 červienia kalehija haspadarčaha suda admoviła ŭ zadavalnieńni kasacyjnaj skarhi partyi.
Staličny ofis pa praśpiekcie Mašerava, 8, arandavaŭsia Partyjaj BNF z 1992 hoda. Dziejny termin arendy zakončyŭsia 31 sakavika 2011 hoda. ŽREA Savieckaha rajona admoviłasia zaklučać novy dahavor arendy, padaŭšy isk ab vysialeńni struktur Partyi BNF z pamiaškańnia. Svaje dziejańni ŽREA rastłumačyła nieabchodnaściu dalejšaha vykarystańnia pamiaškańnia «dla ŭłasnych patreb».
Videa Alaksandra Vasileŭskaha, BiełaPAN.