Milicyja abviarhaje infarmacyju, što zatrymanaja 3 lipienia žančyna straciła dzicia
Minskaja milicyja abvierhła infarmacyju, što źjavilisia ŭ niekatorych interniet ŚMI ab tym, što zatrymanaja 3 lipienia na Pryvakzalnaj płoščy Minska žančyna straciła dzicia.
Pryvodzim tekst zajavy milicyi całkam, zamianili imia žančyny na inicyjały:
«11 lipienia 2011 niekatoryja tak zvanyja «niezaležnyja internet-ŚMI» masava paviedamili pra stratu ciažarnaści adnoj z udzielnic niesankcyjanavanych masavych mierapryjemstvaŭ 3 lipienia na Pryvakzalnaj płoščy stalicy. Pakolki aŭtary infarmacyi naŭprost abvinavacili ŭ hetym trahičnym vypadku supracoŭnikaŭ milicyi, to HUUS Minharvykankama pa dadzienym fakcie była praviedziena pravierka. Jaje papiarednija vyniki pakazali, što dadzienaja infarmacyja, miakka kažučy, nie adpaviadaje rečaisnaści.
Tak, 3 lipienia 2011 hoda ŭ 19.35 z Pryvakzalnaj płoščy čyhunačnaha vakzała h. Minska ŭ Kastryčnickaje RUUS była dastaŭlenaja dla raźbiralnictva R., 1987 hoda naradžeńnia, zarehistravanaja ŭ stalicy pa vulicy ...
Padčas padrychtoŭki spravy ab administracyjnym pravaparušeńni R. paviedamiła supracoŭnikam Kastryčnickaha RUUS pra toje, što jana, mahčyma, ciažarnaja. Pry hetym bačnych prykmiet ciažarnaści ŭ R. nie było.
Padčas razhladu ŭ rajonnym UUS R. nijakich skarhaŭ na stan zdaroŭja nie vykazvała i dapamohi ŭ prysutnych u toj momant u budynku supracoŭnikaŭ chutkaj miedycynskaj dapamohi nie prasiła. A 11 lipienia jana samastojna źjaviłasia ŭ sud Kastryčnickaha rajona h. Minska dla razhladu spravy ab administracyjnym pravaparušeńni ŭ dačynieńni da jaje. Pavodle śviedčańniaŭ vidavočcaŭ, da i paśla sudu dziaŭčyna znachodziłasia ŭ dobrym nastroi, jakich-niebudź bačnych prykmiet parušeńnia zdaroŭja nie było, skarhaŭ i pretenzij nie vykazvała.
Padčas dalejšaj papiaredniaj pravierki byŭ atrymany adkaz z Kamiteta pa achovie zdaroŭja Minharvykankama, u jakim ukazana, što R. na ŭliku pa ciažarnaści va ŭstanovach achovy zdaroŭja h.Minska nie była i z 4 pa 11 lipienia 2011 hoda pa pytańni pierapynieńnia (pierapynienaj) ciažarnaści va ŭstanovy achovy zdaroŭja stalicy nie źviartałasia».
***
Nahadajem, što na minułym tydni ŭ niekatorych ŚMI źjaviłasia infarmacyja, što paśla zatrymańnia ciažarnaja R. straciła dzicia, ale admaŭlajecca ad kamientaroŭ.