U Bałharyi znoŭ adznačany vypadki atručeńnia biełaruskich dziaciej

Pryčyna zachvorvańnia — niajakasnyja pradukty charčavańnia.

U Bałharyi ŭ łahiery «Čaŭdar» kala kurortnaha horada Obzar adznačany vypadki atručeńnia biełaruskich dziaciej.

Jak paviedamiŭ BiełaPAN namieśnik dyrektara departamienta pa turyźmie Ministerstva sportu i turyzmu Andrej Martynaŭ, z 13 pa 19 lipienia zachvareli 24 biełaruskija dziciaci, jakich adpraviła na adpačynak u Bałharyju turystyčnaja firma «Viaršynia» i, mahčyma, inšyja turarhanizacyi. U dziaciej adznačalisia młosnaść, irvota, u niekatorych — dyjareja.

Pryčyna zachvorvańnia — niajakasnyja pradukty charčavańnia,

Pavodle słoŭ Martynava, dzieci atrymali nieabchodnuju miedycynskuju dapamohu, stan zdaroŭja ich zdavalniajučy, špitalizacyja nie spatrebiłasia.

Pradstaŭnik Minsportu padkreśliŭ, što ŭvieś uron budzie pakryty strachavoj kampanijaj.

Nahadajem, hetym letam užo adznačalisia masavyja atručeńni biełaruskich dziaciej u Bałharyi. 11 lipienia ŭ biełaruskaje pasolstva pastupiła infarmacyja pra masavaje atručeńnie dziaciej u hateli «Hryn Park» u bałharskim Kitenie. U toj ci inšaj stupieni zachvareli kala 100 čałaviek. Masavaje atručeńnie adbyłosia z-za niajakasnaj vady ŭ hateli.

U suviazi z hetymi padziejami Minsportu Biełarusi aficyjna zajaviła, što turarhanizacyi abaviazanyja infarmavać klijentaŭ, jakija vyjazdžajuć za miažu, ab sanitarna-epidemičnaj abstanoŭcy ŭ krainie adpačynku i mahčymaj ryzycy zaražeńnia infiekcyjnymi zachvorvańniami, a taksama ŭručać im adpaviednyja pamiatki.

Kamientary da artykuła