Rasstralali dvuch žycharoŭ Hrodna, pryhavoranych da vyšejšaj miery pakarańnia hod tamu

Rasstralali dvuch žycharoŭ Hrodna — Aleha Hryškaŭca i Andreja Burdyku, pryhavoranych da vyšejšaj miery pakarańnia kala hoda tamu. Pra heta paviedamlaje hazieta «Viečiernij Hrodno».

Pryhavor pa spravie ab zabojstvie troch čałaviek vyniesieny Hrodzienskim abłasnym sudom 14 maja 2010 hoda. Złačynstva było ŭčyniena nočču 14 kastryčnika 2009 hoda ŭ kvatery doma na vulicy Kabiaka ŭ Hrodnie. Pažarnyja, jakija prybyli likvidavać uzharańnie, znajšli trupy 65-hadovaha haspadara, jaho 34-hadovaj niaviestki i jaje 52-hadovaj znajomaj. Źnik syn maładoj žančyny, piacikłaśnik.

Śledstva ŭstanaviła, što 28-hadovy i 29-hadovy raniej sudzimyja žychary Hrodna źjavilisia ŭ hetaj kvatery pozna viečaram 13 kastryčnika pad markaj sumiesnaha raśpićcia śpirtnych napojaŭ, majučy namier zavałodać majomaściu haspadaroŭ. Pryblizna ŭ 2.00 14 kastryčnika z małaznačnaj nahody jany raspačali svarku z haspadarami, padčas jakoj zabili troch čałaviek: mužčynu i dźviuch žančyn. Školniku, jaki znachodziŭsia ŭ kvatery, złačyncy pryhrazili zabojstvam, kali jon kamu-niebudź raskaža pra ŭbačanaje. Paśla hetaha jany padpalili kvateru i pajšli, uziaŭšy z saboj kampjutar, inšyja rečy.

Sprabujučy pajechać dalej ad Hrodna, złačyncy spynili taksi i prapanavali vadzicielu advieźci ich u Minsk abo Maskvu, majučy namier raźličycca ź im vykradzienym kampjutaram. Kali jon admoviŭsia, pryhrazili zabić i navat pasprabavali ŭdaryć nažom, adnak lehkaranienamu taksistu ŭdałosia ŭciačy.

Zatym złačyncy pasprabavali vykraści «Aŭdzi-80» sa stajanki, jakaja nie achoŭvajecca, ale zrabić im heta nie ŭdałosia. Z sałona jany vykrali vadzicielskaje paśviedčańnie ŭładalnika, techpašpart na aŭtamabil i inšyja dakumienty.

Paśla hetaha maładyja ludzi ź dziciem nakiravalisia ŭ kvateru adnaho ź ich, kab abmierkavać dalejšyja płany. Tam ich zatrymała milicyja.

Abłasny sud pryznaŭ abodvuch vinavatymi va ŭčynieńni złačynstvaŭ, praduhledžanych pp. 1, 6, 12, 15 č. 2 art. 139 (zabojstva dvuch i bolš asob z asablivaj žorstkaściu, źviazanaje z razbojnym napadam, učynienaje hrupaj asob), č. 3 art. 207 (razboj z naniasieńniem ciažkich cialesnych paškodžańniaŭ), č. 2 art. 218 (naŭmysnaje paškodžańnie majomaści šlacham padpału), pp. 1, 6 č. 2 art. 182 (vykradańnie małaletniaha hrupaj asob), č. 2 art. 207 (razbojny napad), č. 1 art. 14 i č. 2 art. 205 (zamach na kradziež aŭtamašyny), art. 378 (kradziež dakumientaŭ) Kryminalnaha kodeksa.

Paśla vyniasieńnia pryhavoru asudžanyja napisali prośbu ab pamiłavańni na imia prezidenta, ale atrymali admovu.

Biełaruś zastajecca adzinaj jeŭrapiejskaj krainaj, u jakoj vynosiacca i pryvodziacca ŭ vykanańnie śmiarotnyja pryhavory. Maratoryj na śmiarotnuju karu źjaŭlajecca adnoj z asnoŭnych umoŭ viartańnia biełaruskamu parłamientu statusu śpiecyjalnaha zaprošanaha Parłamienckaj asamblei Rady Jeŭropy.

Kamientary da artykuła