Zatrymańnie Alesia Bialackaha vyklikaje «vielizarnuju zaniepakojenaść» u ZŠA
Jak havorycca ŭ kamientary dla BiełaPAN pasolstva ZŠA ŭ Biełarusi, «zatrymańnie 4 žniŭnia kiraŭnika pravaabarončaha centra „Viasna 96“ Alesia Bialackaha vyklikaje vielizarnuju zaniepakojenaść i źjaŭlajecca jašče adnoj vartaj škadavańnia prykmietaj samaizalacyi Biełarusi i jaje dalejšaha adychodu ad jeŭrapiejskich norm i pryncypaŭ».
«U demakratyčnym hramadstvie niaŭradavyja arhanizacyi, takija jak „Viasna 96“ (jakoj ułady praciahvajuć admaŭlać u rehistracyi), adyhryvajuć klučavuju rolu ŭ značnaj sistemie strymańniaŭ i procivahaŭ. Pryznajučy hetuju rolu, dziaržavy zakonam zabiaśpiečvajuć umovy, nieabchodnyja dla pracy i praćvitańnia treciaha siektara, a nie imknucca marhinalizavać hramadzianskuju supolnaść, admaŭlajučy ŭ rehistracyi, praśledujučy i zatrymlivajučy aktyvistaŭ niaŭradavych arhanizacyj», — zajaŭlajuć u pasolstvie ZŠA ŭ Biełarusi.
Nahadajem, 4 žniŭnia Aleś Bialacki paśla dopytu ŭ departamiencie finansavych rasśledavańniaŭ Kamiteta dziaržkantrolu (KDK) byŭ uziaty pad vartu. Pavodle najaŭnaj infarmacyi, jon zatrymany na troje sutak u jakaści padazronaha pa spravie, raspačataj na padstavie častki 2 artykuła 243 Kryminalnaha kodeksa (uchileńnie ad vypłaty sum padatkaŭ, zboraŭ u asabliva bujnym pamiery). Maksimalnaje pakarańnie pa hetym artykule — pazbaŭleńnie voli na siem hadoŭ z kanfiskacyjaj majomaści.