Kiraŭnik MZS Litvy asudziŭ zatrymańnie Alesia Bialackaha

Ministr zamiežnych spraŭ Litvy Aŭdronius Ažubalis, dziejny staršynia ABSIE, asudziŭ zatrymańnie biełaruskaha pravaabaroncy Alesia Bialackaha.

«Sudy nad ŭdzielnikami demanstracyi 19 śniežnia, sistematyčnaje zadušeńnie ŚMI i svabody schodaŭ, praciah pieraśledu pradstaŭnikoŭ apazicyi, niaŭradavych arhanizacyj i hramadzianskaj supolnaści śviedčać ab surjoznym parušeńni situacyi z pravami čałavieka ŭ Biełarusi», — zajaviŭ Ažubalis.

Jon zaklikaŭ aficyjny Minsk nieadkładna vyzvalić usich palityčnych źniavolenych i aktyvistaŭ hramadzianskaj supolnaści. Biełaruś pavinna vykonvać svaje abaviazacielstvy ŭ miežach ABSIE ŭ śfiery pravoŭ čałavieka i asnoŭnych svabod, jakija byli paćvierdžany na samym vysokim uzroŭni ŭ śniežni 2010 hoda na samicie ABSIE ŭ Astanie, padkreśliŭ kiraŭnik MZS Litvy.

Vice-prezident Mižnarodnaj fiederacyi pravoŭ čałavieka, kiraŭnik zakrytaha biełaruskimi ŭładami pravaabarončaha centra «Viasna» Aleś Bialacki byŭ zatrymany 4 žniŭnia ŭ Minsku supracoŭnikami departamienta finansavych rasśledavańniaŭ KDK. Pavodle najaŭnaj infarmacyi, Bialacki zatrymany na troje sutak u jakaści padazronaha pa spravie, raspačataj na padstavie častki 2 artykuła 243 Kryminalnaha kodeksa (uchileńnie ad vypłaty sum padatkaŭ, zboraŭ u asabliva bujnym pamiery). Maksimalnaje pakarańnie pa hetym artykule — pazbaŭleńnie voli na siem hadoŭ z kanfiskacyjaj majomaści.

Kamientary da artykuła