DAI pravodzić masavanuju adpracoŭku asnoŭnych aŭtadaroh
U metach stabilizacyi stanovišča na darohach Biełarusi, arhanizacyi biaśpieki darožnaha ruchu 5–7 žniŭnia Dziaržaŭtainśpiekcyja pravodzić masavanuju adpracoŭku asnoŭnych aŭtadaroh i miescaŭ kancentracyi DTZ. Śpiecpadraździaleńniedarožna-patrulnaj słužby DAI «Strała» budzie adpracoŭvać Dziaržynski i Staŭbcoŭski rajony.
Jak paviedamili va ŭpraŭleńni DAI MUS, pry nahladzie za darožnym rucham padčas niehałosnaha i źmiašanaha kantrolu maksimalna zadziejničany ŭsie najaŭnyja techničnyja srodki kantrolu za chutkasnymi režymami. Akramia taho, pavodle prykładu Minskaj vobłaści pa ŭsioj krainie buduć aktyŭna vykarystoŭvacca aŭtamatyzavanyja kompleksy «Aŭtaŭrahan», jakija dazvalajuć efiektyŭna vyjaŭlać vadzicielaŭ biez pravoŭ. Z dapamohaj hetaj sistemy, nie zatrymlivajučy transpartny patok, možna identyfikavać pa numarnych znakach aŭtamabili i vyjavić pa bazie danych tyja, čyje ŭładalniki nie majuć prava kiravańnia transpartnymi srodkami abo byli pazbaŭleny jaho za pravaparušeńni za rulom, a taksama pazbaŭleny prava, ale nie zdali vadzicielskaje paśviedčańnie va ŭstanoŭlenym paradku.
Tolki ŭ pieršym paŭhodździ pa vinie vadzicielaŭ, jakija nie majuć pravoŭ, na darohach krainy adbyłosia 271 DTZ, u jakich 48 čałaviek zahinuli i 300 atrymali ranieńni. U kožnym druhim vypadku vadzicieli znachodzilisia za rulom u niećviarozym stanie.
U bolšaści vypadkaŭ «biaspraŭniki» — heta vadzicieli, pazbaŭlenyja prava kiravańnia transpartnymi srodkami za hrubyja parušeńni PDR, takija jak pieravyšeńnie chutkaści, parušeńnie praviłaŭ abhonu i kiravańnie transpartnym srodkam u stanie ałkaholnaha apjanieńnia.
DAI papiaredžvaje, što za vadžeńnie biez prava kiravańnia transpartnym srodkam vadzicielu pahražaje štraf da 700.000 rubloŭ, a za paŭtornaje takoje parušeńnie zakonu na praciahu hoda možna pazbavicca amal dvuch miljonaŭ rubloŭ.