Na Vaŭkavyskim miasakambinacie znajšli virus šalenstva ŭ miasie
Adnak spačatku chavali tuju infarmacyju.
U redakcyju «Našaj Nivy» źviarnulisia zaniepakojenyja vaŭkavyskija čytačy z paviedamleńniem, što ŭ miasie žyvioły, dastaŭlenaj na miascovy miasakambinat, znojdzienaje šalenstva. I supracoŭnikam pradpryjemstva robiacca pryščepki ad hetaha zachvorvańnia.
Adzin z pracaŭnikoŭ miasakambinata, ź jakim udałosia źviazacca žurnalistu «NN», paviedamiŭ, što ŭ padčas zaboju skata ŭ niekalkich asobin byli vyjaŭleny simptomy šalenstva. Padazronyja tušy adrazu adpravili na ekśpiertyzu. Ich miasa patrapić u pradukcyju pradpryjemstva nie mahło. Na kambinat byli vyklikany śpiecyjalisty vieterynarnaj inśpiekcyi i hałoŭurač sanepidemstancyi Vaŭkavyska.
Infarmacyju paćvierdziŭ haziecie «Viečiernij Hrodno» hałoŭny dziaržvietinśpiektar Hrodzienskaj vobłaści Mikałaj Kot, 2 žniŭnia ekśpiertyza paćvierdziła najaŭnaść virusu ŭ daśledavanym miasie. Adnak znajdzienaje šalenstva źjaŭlajecca pryrodnaj formaj hetaj chvaroby (asnoŭnyja pieranosčyki — lisy). Heta nie było asabliva niebiaśpiečnaje karovina šalenstva. Taksama śpiecyjalist zapeŭniŭ, što niama padstavy chvalavacca za jakaść astatniaj miasnoj pradukcyi Vaŭkavyskaha miasakambinata. Virus šalenstva hinie pry termičnaj apracoŭcy, jakuju prachodziać usie tušy žyvioły, i nie moža naškodzić čałaviečamu zdaroŭju.
Chvoraja chudoba trapiła na kambinat ź fiermy «Malkavičy» SVK «Aziaranski» Mastoŭskaha rajona.
Ciapier tyja tušy źniščanyja, a na fiermie pravodzicca vakcynacyja skaciny. Taksama zrabili pryščepki zabojščykam ź miasakambinata.
U samim Vaŭkavysku hetuju šarahovuju spravu trymali ŭ tajamnicy. U pryjomnaj Vaŭkavyskaha miasakambinata 4 žniŭnia žurnalistu «NN» kateharyčna adkazali, što nijakaha šalenstva ŭ žyvioły, jakuju zakuplaje pradpryjemstva, niama. Inakš kažučy, zmanili. U vaŭkavyskaj sanepidemstancyi dali taki ž adkaz, dadaŭšy, što nichto ź miasakambinata nie paviedamlaŭ im pra vypadki šalenstva.