Termin utrymańnia pad vartaj Alesia Bialackaha praciahnuty da 10 sutak

Jaho pieraviali ŭ śledčy izalatar na Vaładarskaha.

Aleś Bialacki zatrymany na 10 sutak, paviedamiła BiełaPAN pravaabaronca Taćciana Raviaka. Pavodle jaje słoŭ, pra heta siońnia viečaram jaho žonku Natallu Bialackuju prainfarmavaŭ śledčy.

photo.bymedia.net

Bialackaha pieravieźli z kamiery departamienta finansavych rasśledavańniaŭ KDK u śledčy izalatar na vulicy Vaładarskaha.

«Aleś adčuvaje siabie narmalna, padaŭlenym nie vyhladaje. Jon nie straciŭ badzioraści duchu»

Zhodna z zakanadaŭstvam, paśla zakančeńnia 10 sutak, adlik jakich viadziecca z momantu zatrymańnia, śledčyja orhany pavinny buduć vystavić Bialackamu abvinavačańnie, vypuścić jaho ź SIZA abo praciahnuć termin jaho ŭtrymańnia pad vartaj.

***

Nahadajem, vice-prezident Mižnarodnaj fiederacyi pravoŭ čałavieka, kiraŭnik zakrytaha biełaruskimi ŭładami pravaabarončaha centra «Viasna» Aleś Bialacki byŭ zatrymany viečaram 4 žniŭnia ŭ Minksku supracoŭnikami departamienta finansavych rasśledavnaniaŭ Kamiteta dziaržkantrolu. Jon padazrajecca va ŭchileńni ad vypłaty padatkaŭ, zboraŭ u asabliva bujnym pamiery (častka 2 artykuła 243 KK). Maksimalnaje pakarańnie zhodna z hetym artykułam — pazbaŭleńnie voli na siem hadoŭ z kanfiskacyjaj majomaści.

Jak paviedamiŭ siońnia na pres-kanfierencyi ŭ Vilniusie pravaabaronca Valancin Stefanovič, u kancy červienia padatkovaja inśpiekcyja padała Bialackamu akt pravierki sa źviestkami ab srodkach, što pastupili ad zamiežnych arhanizacyj na jaho rachunak u litoŭskim banku Nord. Padatkovyja inśpiektary paličyli hetyja srodki ŭtojenym dachodam. U pačatku lipienia taki ž akt, ale sa źviestkami pa litoŭskim banku SEB, byŭ padadzieny samomu Stefanoviču. Adnak suma, vyjaŭlenaja na rachunku Stefanoviča, nie takaja značnaja, kab u dačynieńni da jaho možna było raspačać kryminalnuju spravu.

«My nie ličym, što parušyli zakanadaŭstva, — zajaviŭ Stefanovič. — Hetyja srodki źbiralisia nie ŭ jakaści dachodu». Jon padkreśliŭ, što biełaruskija pravaabaroncy za hady svajoj dziejnaści padtrymali tysiačy hramadzian, čyje pravy byli parušanyja.

Kamientary da artykuła