Zdaroŭje i sport Minsku niepatrebnyja

Za siem miesiacaŭ hetaha hoda ŭ Minsku asvojena mienš za 40% srodkaŭ, vydzielenych na budaŭnictva abjektaŭ achovy zdaroŭja, fizkultury i sportu.

Naprykład, pavodle infarmacyi Hałoŭnaha statystyčnaha ŭpraŭleńnia Minska, hadavy abjom rabot pa rekanstrukcyi respublikanskich navukova-praktyčnych centraŭ (RNPC) «Kardyjałohija» i «Maci i dzicia» vykanany na 21,6% i 7,3% adpaviedna. U toj ža čas srodki, nakiravanyja na budaŭnictva apieracyjnaha błoka i adździaleńnia intensiŭnaj terapii, aniestezijałohii i reanimacyi RNPC pulmanałohii i ftyzijatryi, asvojeny ŭžo ŭ poŭnym abjomie.

Praciahvajecca rekanstrukcyja Hałoŭnaha vajennaha kliničnaha miedycynskaha centra. Sioleta płanujecca zaviaršyć rekanstrukcyju budynka praktałohii i hnojnaj chirurhii, a taksama rekanstrukcyju inžyniernych sietak, u 2012-m — budynka chirurhičnaha korpusu. Hadavoje zadańnie pa vykarystańni inviestycyj u asnoŭny kapitał na hetym abjekcie za studzień-lipień vykanana na dźvie traciny.

Biudžetnaje finansavańnie sioleta taksama nakiroŭvajecca na madernizacyju nastupnych abjektaŭ: budaŭnictva šmatprofilnaj spartyŭnaj zały pa hulniavych vidach sportu Respublikanskaha dziaržaŭnaha vučylišča alimpijskaha reziervu, vučebna-trenirovačnaha centra frystajła, spartyŭnaha kompleksu Respublikanskaha centra alimpijskaj padrychtoŭki pa mastackaj himnastycy, lohkaatletyčnaha manieža i płavalnaha basiejna Biełaruskaha dziaržaŭnaha instytuta fizičnaj kultury. Raboty na abjektach viaducca ŭ adpaviednaści z zaćvierdžanymi hrafikami i svoječasova apłačvajucca ź biudžetu. Realizacyja ŭsich hetych prajektaŭ raźličana da 2012–2013 hadoŭ.

Budaŭnictva internata na 600 miescaŭ Respublikanskaha dziaržaŭnaha vučylišča alimpijskaha reziervu i druhaja čarha pašyreńnia materyjalna-techničnaj bazy Pałaca tenisa pavinny być zavieršanyja da kanca 2011 hoda. Na 1 žniŭnia zapłanavany na hod abjom inviestycyj na hetych abjektach asvojeny napałovu.

Kamientary da artykuła