Siońnia kiraŭnictva MVF pavinna razhledzieć zajaŭku Biełarusi na kredyt

Zajaŭka była nakiravana biełaruskim uradam u MVF 31 maja.

Saviet dyrektaraŭ Mižnarodnaha valutnaha fondu (MVF) płanuje siońnia razhledzieć zajaŭku Biełarusi na vydzialeńnie stabilizacyjnaha kredytu ŭ pamiery ad 3,5 da 8 miljardaŭ dołaraŭ ZŠA. Zajaŭka była nakiravana biełaruskim uradam u MVF 31 maja.

Na siońniašnim pasiadžeńni kiraŭnictva MVF taksama pavinna abmierkavać spravazdaču, padrychtavanuju misijaj fondu, jakaja pracavała ŭ Minsku ŭ pieršaj pałovie červienia. Saviet dyrektaraŭ, u pryvatnaści, daść acenku ekanamičnaj palitycy biełaruskaha ŭrada paśla prahramy stend-baj, jakaja zaviaršyłasia ŭ krasaviku 2010 hoda.

Nahadajem, u ramkach stabilizacyjnaj prahramy stend-baj Biełaruś u 2009–2010 hadach atrymała ad MVF piać tranšaŭ kredytu na ahulnuju sumu 3,46 młrd. dołaraŭ.

Kab raźličvać na atrymańnie novaha kredytu, Biełaruś pavinna pradstavić MVF dakładnuju antykryzisnuju prahramu. Jak zajaviła 4 žniŭnia pastajanny pradstaŭnik fondu ŭ Minsku Natalla Kaladzina, uradu nieabchodna pradstavić jak pakiet mier u halinie makraekanamičnaj palityki, tak i pakiet strukturnych pieraŭtvareńniaŭ.

Asnoŭnaj prablemaj biełaruskaj ekanomiki ciapier źjaŭlajecca množnaść kursu biełaruskaha rubla.

Razam z tym, da 1 vieraśnia ŭrad pavinien kančatkova vyznačyć ekanamičny kurs raźvićcia krainy. «Dalej ciahnuć nielha. Da aŭtorka-sierady (30–31 žniŭnia. — BiełaPAN.) usio budzie źviedziena ŭ adziny dakumient i vyniesiena na ŭzrovień prezidenta, i ja asabista abviašču ludziam, jak budzie dziejničać urad i Nacbank u hetaj situacyi», — paabiacaŭ Łukašenka.

«Paŭtara-dva miesiacy ŭ nas na stabilizacyju situacyi na valutnym rynku. Poŭnaściu. Katastrofy niama, situacyja kantralujemaja, ale patrabuje pryniaćcia peŭnych rašeńniaŭ», — padkreśliŭ Łukašenka.

Kamientary da artykuła