Čas palić archivy
Były supracoŭnik struktur pry Administracyi prezidenta Uładzimir Iskryk źviartajecca da pałkoŭnika Uładzimira Makieja i hienierała Leanida Malcava.
Hety list dasłaŭ u «Našu Nivu» Uładzimir Iskryk. Piśmieńnik, raniej jon pracavaŭ u strukturach Administracyi prezidenta. Heta — jaho adkryty zvarot da ziemlakoŭ, kiraŭnika Administracyi prezidenta Uładzimira Makieja i dziaržsakratara Rady biaśpieki Leanida Malcava. (Malcaŭ i Iskryk naradzilisia pad Słonimam, Makiej — kala Karelič.)
Chłopcy, ja vymušany źviarnucca da vas publična, bo vas adsiekli ad usialakaje infarmacyi i zavalvajuć prapahandysckim śmiećciem, kab nie zastałosia času ŭśviedamić žudaść taho, dzie vy znachodziciesia i što vas čakaje. Ja napisaŭ by navat, kab heta datyčyła tolki kahości z vas asabista, ale kožnaja vaša pamyłka čynić bol i mnie, i sotniam tysiač biedakoŭ ź biełaruskim pašpartam.
«Pieramožcy siabie tak nie pavodziać»
Siarod bieźličy dvoječnikaŭ i troječnikaŭ, što pierapaŭniajuć uładnyja struktury, vy, dy chiba jašče čałavieki dva, majecie vyšejšuju kvalifikacyju, stratehičnaje myśleńnie i talent.
Spadziajusia, vy pryznali vysnovu našych blizkich znajomych, byłych načalnikaŭ i padnačalenych, kaleh pa «vajskovaj adzincy 44388», prosta našych z vami ziemlakoŭ: «Nie tuju dziaržavu pabudavali!»Publikacyi i acenki paŭtuzina pałkoŭnikaŭ vyviedki i kontrvyviedki, u tym liku načalnika analityčnaj słužby HRU SSSR, nie mohuć być lehkavažanyja. Ale ž jany havorać nastupnaje:
1. Piermanientny vajenny stan pieratvarajecca ŭ kryminalnuju dziaržaŭnaść.2. Umacavańnie represiŭnaj viertykali aznačaje niepaźbiežnuju stahnacyju hramadstva, a ŭłada ŭsprymajecca słužboŭcami jak prava na samadurstva i zładziejstva.
3. Prapahanda stanovicca «pierakonvańniem svaich», narod žyvie va ŭłasnym maralna-infarmacyjnym poli.
4. Ułada abapirajecca na parazityčnyja słai i struktury hramadstva i pryhniečvaje kreatyŭnyja, až da źniščeńnia.
Biełaruś stała inšaj
Skłałasia inšaja dziaržava: ź inšym narodam, ekanomikaj, spadziavańniami stvaralnych słajoŭ hramadstva.
Vas zavalvajuć śmiećciem prablem, plotak, drabiazy sielsavieckaha maštabu. Čamu heta praciahvajecca da siońnia?Šelenbierh tłumačyŭ, što cišynia kabinieta, dyvany, vyškalenyja adjutanty, biezumoŭnaje vykanańnie zahadaŭ stvarali iluziju nieparušnaści ładu navat paśla realizacyi formuły «fiurar kaput, a my vykanaŭcy».
Biełaruś paśla 19 śniežnia stała inšaj dziaržavaj, a paśla 19 lutaha pryznana suśvietnaj supolnaściu jak čužarodnaje ŭtvareńnie ŭ cyvilizavanaj Jeŭropie.
Piermanientny vajenny stan
Dziažurstva i kruhłasutačnaje patrulavańnie ŭzbrojenych farmiravańniaŭ usich rodaŭ i viedamstvaŭ; kruhłasutačny nieabmiežavany nadhlad usich hramadzianaŭ i pamiaškańniaŭ; cenzura siłavych struktur nad usimi ŚMI, vyrazańnie luboje infarmacyi, nie dazvolenaj siłavikami; absalutny kantrol nad usimi finansavymi apieracyjami pryvatnych i jurydyčnych asobaŭ; previentyŭnyja źniavoleńni; kantrol i adklučeńnie internetu i suviazi.
Ach, jak chočacca paŭtaryć Lenina: «Rasstralać... zaklučyć u kancentracyjnyja łahiery ŭsich, chto dumaje inakš, čym my napisali ŭ našych dekretach».
Zazirnicie ŭ svaje akademičnyja padručniki, i vy ŭbačycie, što
z momantu, kali HRU Biełaruskaj vajskovaj akruhi pierachapiła ŭładu Kiebiča, faktyčny vajenny stan nie ŭviedzieny zakonna, ale i nie admienieny.
Tak karoŭ nie pasuć
Čamu niemahčyma ekanamičnaje raźvićcio?
Vy prymušajecie karovu jeści tuju kupinu, kudy tyckajecie jaje pysaju. Tak karoŭ nie pasuć.Chto ź ich atrymlivaje minimałku — hadami pracujučy va ŭbytak?Andropaŭski paradak aznačaŭ ulik pracy, zamiest savieckaha «ŭ hrupavym seksie možna sačkanuć». Vaša ž ekanomika aznačaje zaachvočvańnie nierentabielnaj vytvorčaści — premii za straty. Dyrektar stratnaha pradpryjemstva maje stolki ž, kolki kiraŭnik paśpiachovaha, plus datacyi.
Biełaruś pracuje na «Hazpram»
Biełaruś kuplała na $100 syraviny, miesiac pracavała i pradavała za $80. I ŭsie byli zadavolenyja! Heta nie ekanomika. Haspadar u Biełarusi nie moh hod pracavać, kab zarabić voz droŭ na zimu. Vy — možacie. Biełaruś pracuje na haz? Na «Hazpram»? Zarablaje na Zachadzie miljardy i addaje Maskvie!
Jak vy, raźviedčyki, možacie vieryć zładziejam, jakija vam dakładvajuć «tempy rostu»? Niaŭžo vy nie viedajecie, što paśla 5% inflacyi statystyka hublaje sistemnaść?Pasadzicie ŭ padvał siaho-taho z urada, z padručnikami palitekanomii. Udziaŭbicie im, što RF nie suśvietnaja «supierdieržava», a siaredniaja rehijanalnaja. Chaj uspomniać hieahrafiju: suprać kaho z susiedziaŭ moža RF pavysić hołas — Kanada, ZŠA, Japonija, Kitaj, Kazachstan, Iran, Turcyja? Ź jakoha času rasiejski rubiel staŭ valutaj, dzie jon pryznajecca?
Z andropaŭskaha tezisa pra zarobleny rubiel i dyscyplinu my majem samadurstva načalnikaŭ. Čamu vy nie ŭziali z Andropava jaho zabaronu budavać AES pad Minskam?
Strata kiravanaści
Karnyja struktury razrastajucca dla kantrolu nad pracoŭnymi.Ale da krachu pryviało nie tolki ekstensiŭnaje raźvićcio orhanaŭ kiravańnia.
Vašy instrukcyi nie vykonvajucca ŭžo va ŭradzie. «Siłavik» adnačasova vysočvaje, aryštoŭvaje, vynosić prysud, sam jaho vykonvaje, sam moža reabilitavać! Čamu adziety jak padvozčyk karmoŭ sa śvinafiermy moža chapać mianie za ruku i vałačy ŭ mašynu biez abaznačeńnia? Dniom, u stalicy! Chto z vas praviadzie raźmiežavańnie, Lonia, Uładzimir?
Sistema samavolstva aznačaje stratu kiravanaści ŭ dziaržavie.Siłavik, parušajučy instrukcyju, robicca vyšej za vas, prezidenta, karala, Boha. Adsiul: ja achoŭvaju prezidenta, mnie nie da złačynnaści ŭ rajonie.
Čas razabracca ź siłavikami
Publična było skazana pra supiervybuchoŭku. Jaje nielha było zrabić, nie zdaŭšy ŭ akademii kursavuju rabotu dyviersanta, tym bolš što hienij — chimik z PTV. Navat «lidarprofi» ci sam pałkoŭnik Kvačkoŭ biez łabaratornaj treniroŭki nie pojdzie na akcyju.
Chłopcy, jak vybuchoŭka atradaŭ asablivaha pryznačeńnia HRU Hienštaba SSSR trapiła achłamonam?Jana ž dahetul stroha zasakrečana pavodle ŭliku?
Hrubaje, demanstratyŭnaje parušeńnie siłavikami vašych instrukcyj pieraniata biurakratyjaj u formie samadurstva — i vy biaśsilnyja, chłopcy.
Tałkovy tezis andropaŭskaj dyscypliny — siońnia ŭ pryncypie akcyja zapałochvańnia biudžetnikaŭ, pierš za ŭsio nastaŭnikaŭ, kab nie skryvili rot: čamu siońnia jany majuć pałovu zarobku ad maja 2010-ha?
Ja vieru ŭ vašu prysiahu
A što vy narabili z suvierenitetam krainy? Kreml hulaje ŭ SSSR, prydumlaje mini-NATO, mini-ES, mini-MVF. Ci dało heta karyść Biełarusi?Kali vy ŭžo nie zadurany ahitprapam «śvietłych haryzontaŭ», to ŭspomnicie lekcyi, dzie siońniašni zładziejski čas razhladaŭsia abjektyŭna?Ja šukaju vam apraŭdańni — i nie znachodžu.
Čas vybrać, ad kaho vaš — i naš! — radavod: ad lejtenantatankista Malcava, jaki na hałaŭnym tanku adkryvaŭ u 1939 u Breście parad Kryvašeina—Huderyjana, ad hienierała-hułahaŭca Malcava ci ad buchhałtara Malcava, jaki imknuŭsia źvieści kancy z kancami ŭ kałhasie, u jakim i ja pracavaŭ z druhoha kłasa Čamiaroŭskaj škoły, dzie i ty vučyŭsia, Lonia.
Čamu vy abodva nie admienicie instrukcyi 30-ch hadoŭ, pavodle jakich vyniščałasia biełaruskaja mova, intelihiencyja?
Viedaju, što vy śpiecyjalisty, a nie ahitprapaŭcy. Ale ž našto tracić bolš pałovy biudžetu na demahohiju?
Paručyciel doma
Nielha pierabrachać usich sabak na viaskovaj vulicy, jak sprabuje vaša prapahanda. Nielha žyć na mohiłkach i reanimavać trupy, jak vaša administracyja i ŭrad.
U vas niama hrošaj? Dyk patrabujcie vykonvać jeŭrapiejskija praviły — i hrošy buduć.Zapatrabujcie napracoŭki, jak paźbiehnuć nacyjanalnaj katastrofy — u t.zv. apazicyi, u tych, za kim dvoječniki haniajucca z dubinami, u intelihiencyi. Znajdzicie paručyciela doma — i $10—12 młrd Biełaruś atrymaje.
Strapianiciesia, ziemlaki!
U nas z vami adbirali movu ŭ VNU (u ciabie, Lavonie, u SVU). Nichto nie pytaŭsia, prosta vybaru nie pakinuli. Siońnia ni radyjo, ni TB, ni knih, ni škoły — pry niemcach i palakach areał biełaruskaj movy byŭ bolšy. Vy ž uzialisia dušyć i nośbitaŭ.
Za dziesiać hadoŭ vaša ideałohija dałdonić adno i toje ž: stabilnaść, paradak na ziamli, pryncyp adnaho akna — heta mnoju sfarmulavanyja tezisy! Ničoha novaha nie zdoleli prydumać.
Siońnia — poŭny krach. Niaŭžo vy nie viedajecie, što pradukcyjnaja pałova hramadstva prosta nie hladzić vašaha savieckaha telebačańnia?Praviercie: nastaŭnicy haziet, knih nie čytajuć, vašych kanałaŭ nie hladziać. Toje ž u viertykali. Dyk dla kaho heta durnota? Vas pierakonvać?
Ja moh by zrabić zapisku na dźvie staronki, ale zza vašaha adharodžvańnia ad ludziej mušu publikavać hety list.
Strapianiciesia, ziemlaki! Vakoł vas nie ŭsia śpitaja idyjatyzavanaja Biełaruś. My znoŭ vučymsia ŭ Prazie, Vilni, Rymie. Nas nie treba karmić. Dajcie nam pracavać.Nie zahaniajcie ŭ savieckuju abščahu i mahnitki. Spynicie finansavańnie ahitprapu ŭzroŭniu 40-ch, sajuznych kamsamolskich pjanak pad vyhladam dypłamatyi; pierajdzicie ad tatalnaj prapahandy da «kłubnaj» ideałohii jeŭrapiejskaj Biełarusi.
Zrazumiejcie: pavodle vašych padručnikaŭ situacyja nazyvajecca: «Čas palić archivy».