Łukašenka klaniecca i dalej budavać Kitaj u Jeŭropie

Pra heta jon zajaviŭ 19 vieraśnia na sustrečy ŭ Minsku sa staršynioj Pastajannaha kamiteta Usiekitajskaha schodu narodnych pradstaŭnikoŭ U Banha.

«Mnohaje, što vy robicie, i ŭ tym liku vielmi mnohaje z vašaj sacyjalna-ekanamičnaj madeli, my zapazyčyli ŭ Biełarusi. My i dalej budziem raźvivać madel sacyjalnaj dziaržavy, tuju madel, jakuju my niekali zapazyčyli ŭ vas. I ja ŭpeŭnieny, što heta budzie i dalej prynosić svaje stanoŭčyja vyniki», — cytuje kiraŭnika dziaržavy jaho pres-słužba.

Łukašenka vykazaŭ udziačnaść Kitaju za sadziejničańnie ŭ vypracoŭcy rašeńniaŭ pa stabilizacyi makraekanamičnaj situacyi ŭ krainie. U suviazi z hetym jon adznačyŭ vialikuju pracu, zroblenuju ekśpiertami Narodnaha banka Kitaja. Pavodle słoŭ Łukašenki, mnohija z rekamiendacyj, jakija jany dali, pryniaty biełaruskim bokam na ŭzbrajeńnie.

Biełaruski kiraŭnik źviarnuŭ uvahu na toje, što handlova-ekanamičnaje i inviestycyjnaje supracoŭnictva aktyŭna raźvivajecca. Jon padkreśliŭ, što miljardnyja kitajskija lhotnyja kredyty i pramyja inviestycyi aktyŭna pracujuć na madernizacyju biełaruskaj ekanomiki, ukaranieńnie pieradavych technałohij, inavacyj.

Łukašenka taksama ličyć, što zapusk pieršaha biełaruskaha spadarožnika suviazi i stvareńnie Kitajska-biełaruskaha industryjalnaha parka zakładuć tryvałuju asnovu dla doŭhaterminovaha partniorstva ŭ śfiery vysokich technałohij, stanuć nakštałt vizitoŭki Kitaja ŭ Jeŭropie.

«Biełaruś źjaŭlajecca vielmi pierśpiektyŭnym i nadziejnym siabram Kitaja ŭ centry Jeŭropy, — skazaŭ Łukašenka. — My zaŭsiody adkryta zajaŭlajem i padkreślivajem, što my hanarymsia takimi blizkimi i ciesnymi adnosinami z našymi kitajskimi siabrami. My radujemsia ŭsim vašym pośpiecham, pačynajučy ad sportu i zakančvajučy hihanckimi krokami ŭ ekanomicy».

«Supracoŭnictva Biełarusi z Kitajem maje stratehičny charaktar, — padkreśliŭ jon. — Heta našy siabry, naša apora ŭ śviecie, jakaja nikoli nam nie zdradžvała ŭ samych ciažkich situacyjach. I my adpaviedna budziem pravodzić palityku, skiravanuju na ŭmacavańnie družby, uzajemadapamohi i padtrymki z kitajskaj dziaržavaj. My ni na krok nie adstupim ad hetaj palityki. Jak my raźličvajem na vas, hetak i vy možacie raźličvać na nas pa ŭsich kirunkach u poŭnym abjomie tak, jak vam heta patrebna».

«Našy stasunki mohuć mieć toj uzrovień, jaki vy pažadajecie, — zapeŭniŭ Łukašenka.

— Vy možacie raźličvać na Biełaruś jak apornuju krainu ŭ Jeŭropie».

Kiraŭnik dziaržavy paabiacaŭ «zaachvočvać i stvarać samyja spryjalnyja ŭmovy dla pracy kitajskich kampanij u Biełarusi».

«Ja vielmi ŭdziačny za kałasalnuju padtrymku ŭ hety niaprosty čas dla našaj krainy. My ludzi abaviazkovyja, my nikoli nie zastaniemsia ŭ daŭhu pierad vašaj dziaržavaj, i vy možacie być upeŭnieny, što majecie tut samych nadziejnych siabroŭ», — zaklučyŭ Łukašenka.

U svaju čarhu U Banha zajaviŭ, što «kitajski bok hłyboka zadavoleny ciapierašnim stanam kitajska-biełaruskich adnosinaŭ», i adznačyŭ nieabchodnaść padtrymać stanoŭčuju dynamiku kantaktaŭ i abmien vizitami na vyšejšym uzroŭni, zachavać vysoki ŭzrovień palityčnaha ŭzajemadavierja.

«Paćviardžajem, što my ćviorda padtrymlivajem abrany vašaj krainaj šlach raźvićcia, a taksama ŭnutranuju i źniešniuju palityku, jakuju pravodzić Biełaruś», — padkreśliŭ jon.

U Banha prapanavaŭ uzmacnić handlova-ekanamičnaje supracoŭnictva, a taksama ŭzajemadziejańnie i kaardynacyju ŭ vyrašeńni mižnarodnych i rehijanalnych pytańniaŭ. Jon kanstatavaŭ, što Biełaruś i Kitaj majuć padobnyja abo adnolkavyja pohlady pa takich pytańniach, jak refarmavańnie Savieta biaśpieki AAN i mižnarodnych finansavych instytutaŭ, baraćba z klimatyčnymi źmienami.

«My i ŭ budučyni budziem naroščvać naša supracoŭnictva ŭ śfiery pravoŭ čałavieka ŭ mižnarodnych arhanizacyjach», — zaznačyŭ U Banha.

Kamientary da artykuła