Rekvizavali kanfiskavanaje: Skład astravieckaha rajspažyŭtavarystva abrabavali na 5 młrd rubloŭ
Na składzie zachoŭvałasia kanfiskavanaje adzieńnie.
Trykatažnaje adzieńnie na sumu amal piać z pałovaj miljardaŭ rubloŭ vynieśli nočču 18 vieraśnia sa składa rajspažyŭtavarystva, što na čyhunačnyj stancyi «Hudahaj» nieviadomyja złamyśniki.
Prakuror Astravieckaha rajona Alaksandr Marcinčyk raskazaŭ: adzieńnie było kanfiskavanaje pa rašeńni suda za niezakonny pieravoz praź miažu Biełarusi i Litvy i zachoŭvałasia na składzie rajspažyŭtavarystva.
U niadzielu nočču skład abrabavali nieviadomyja złačyncy. Alaksandr Marcinčyk paviedamiŭ: vartaŭnik składa raskazaŭ, što na pačatku druhoj hadziny nočy ŭ starožku zajšli dvoje mužčyn.
Adzin ź ich udaryŭ vartaŭnika nahoj u hrudzi i zahadaŭ maŭčać. Vartaŭnika źviazali.
Paciarpieły raskazvaje: jon čuŭ, što na terytoryju składa zajechali nie mienš za dźvie mašyny. Kala siami hadzin ranicy, kali na vachtu pryjšli źmienščyki, skład byŭ pusty.
Namieśnik načalnika ašmianskaj mytni Siarhiej Sobaleŭ paćvierdziŭ fakt kradziažu zatrymanaha mytniaj i kanfiskavanaha sudom trykatažnaha adzieńnia. Ale kamu jano naležyć, Siarhiej Sobaleŭ nie skazaŭ. U intaresach śledstva ad kamientaroŭ pa złačynstvie admoviŭsia taksama namieśnik načalnika rajadździeła milicyi Marek Sinkievič.
Milicyja šukaje skradzieny trykataž. Zaviedzienaja kryminalnaja sprava.