Hrodzienski abłasny sud pakinuŭ u sile vyrak žurnalistu Andreju Pačobutu
20 vieraśnia Hrodzienski abłasny sud nie zadavoliŭ kasacyjnuju skarhu miascovaha žurnalista Andreja Pačobuta na vyrak Leninskaha suda horada.
Nahadajem, 5 lipienia sud Leninskaha rajona Hrodna pryznaŭ karespandenta polskaj «Haziety vyborčiej» vinavatym na padstavie častki 1 artykuła 367 (paklop u dačynieńni da prezidenta) Kryminalnaha kodeksa za šerah artykułaŭ z krytykaj dziejsnaj ułady. Pačobuta prysudzili da troch hadoŭ pazbaŭleńnia voli z adterminoŭkaj na dva hady.
Sudovy praces byŭ zakrytym.
Kamientujučy BiełaPAN rašeńnie abłasnoha suda, Pačobut adznačyŭ: "Palityčnaja situacyja ŭ krainie ciapier adroźnivajecca ad toj, jakaja była ŭ krasaviku, kali mianie aryštavali, tamu ŭ mianie byli niejkija iluzii. Ale siońniašniaje rašeńnie — heta sihnał usim žurnalistam, što ničoha ŭ krainie ŭ halinie svabody presy nie pamianiałasia. Režym Łukašenki budzie praciahvać nacisk i pieraśled žurnalistaŭ".
Pavodle słoŭ Pačobuta, abłasny sud nie pryniaŭ da ŭvahi pradstaŭlenyja ŭ jaho kasacyjnaj skarzie fakty, jakija śviedčyli ab pracesualnych parušeńniach, dapuščanych u miežach rasśledavańnia jaho kryminalnaj spravy. U pryvatnaści, nie było zadavolena chadajnictva žurnalista ab vykliku ŭ sud niekatorych śviedak, u tym liku eks-kandydata ŭ prezidenty Andreja Sańnikava. Prakuror zajaviŭ, što heta moža "pieratvaryć praces u bałahan", raskazaŭ Pačobut.
Pry abskardžańni vyniesienaha jamu pryhavoru hrodzienski žurnalist źbirajecca prajści ŭsie sudovyja instancyi ŭ Biełarusi, a zatym padać skarhu ŭ Kamitet AAN pa pravach čałavieka. "Biełaruskaja sudovaja sistema nie źjaŭlajecca niezaležnaj, tamu ciažka čakać abjektyŭnaści pry razhladzie spravy ab nibyta paklopie ŭ dačynieńni da Łukašenki", — padkreśliŭ Andrej Pačobut.