Biełaruski režym u AAN padtrymali Kuba i Rasija

Rada AAN pa pravach čałavieka razhledzieła dakład pa situacyi ŭ Biełarusi.

Rada AAN pa pravach čałavieka na svajoj minułaj siesii ŭ červieni pryniała admysłovuju rezalucyju pa situacyi z pravami čałavieka i fundamientalnymi svabodami ŭ Biełarusi, u jakoj zakranalisia pytańni, źviazanyja z parušeńniami pravoŭ čałavieka ŭ krainie paśla prezidenckich vybaraŭ 19 śniežnia 2010 h., paviedamlaje Kamitet mižnarodnaha kantrolu za situacyjaj z pravami čałavieka ŭ Biełarusi.

U rezalucyi Rada taksama daručyła Viarchoŭnamu Kamisaru AAN pa pravach čałavieka padrychtavać ahladny dakład pra źmienu stanovišča palityčnych źniavolenych, pravaabaroncaŭ, žurnalistaŭ i advakataŭ, a taksama inšych pytańniach, jakija adlustroŭvajuć ahulnuju situacyju z pravami čałavieka ŭ krainie.

Na hetaj siesii Rady byŭ pradstaŭleny pramiežkavy varyjant dakładu, a kančatkovaja jaho viersija budzie padrychtavanaja da 20-j siesii Rady AAN pa pravach čałavieka ŭ červieni 2012 hoda. Na žal, za čas padrychtoŭki pramiežkavaha dakłada supracoŭnikam Upraŭleńnia Kamisara tak i nie ŭdałosia atrymać dostup u krainu dla praviadzieńnia niepasrednaha manitorynhu, tamu dadzienyja dla dakłada byli sabranyja z adkrytych krynic, publikacyj ŚMI, dakładaŭ niaŭradavych arhanizacyj (u tym liku padrychtavanych Kamitetam mižnarodnaha kantrolu za situacyjaj z pravami čałavieka ŭ Biełarusi), a taksama dakumientaŭ, pradstaŭlenych biełaruskimi ŭładami.

U dakładzie adlustravanyja ŭsie najvažniejšyja spravy palityčnych źniavolenych u Biełarusi, stanovišča pravaabaroncaŭ — u pryvatnaści, niadaŭni aryšt Alesia Bialackaha, a taksama stanovišča advakataŭ, žurnalistaŭ, svaboda mirnych schodaŭ i asacyjacyj.

U miežach interaktyŭnaha dyjałohu, jaki supravadžaŭ prezientacyju dakładu, była dadzienaja mahčymaść vykazacca dziaržavam-udzielnicam Rady, a taksama naziralnikam.

Aficyjnyja pradstaŭniki Biełarusi ŭ čas debataŭ vykazali svaju niazhodu z dakładam, a taksama niedavier pracy Upraŭleńnia Viarchoŭnaha Kamisara ŭ cełym. Jany nieadnarazova paŭtaryli, što vystupajuć suprać «palityzacyi raboty Rady pa pravach čałavieka» i abmierkavańnia pytańniaŭ, jakija datyčać situacyi ŭ jakoj-niebudź asobnaj krainie.

Astatnija dziaržavy-ŭdzielniki padzialilisia na dva łahiery — krainy, jakija vystupajuć u padtrymku aśviatleńnia situacyi ŭ Biełarusi i prymusu ŭładaŭ da źmienaŭ, i krainy, jakija vystupajuć «suprać palityzacyi». U padtrymku biełaruskich uładaŭ užo tradycyjna vykazalisia Rasija i Kuba, a suprać — krainy Zachodniaj Jeŭropy, Paŭnočnaj i Łacinskaj Amieryki.

NDA taksama mieli mahčymaść vystupić padčas interaktyŭnaha dyjałohu ŭ jakaści naziralnikaŭ — svaje kamientary hetym razam ahučyli pradstaŭniki Mižnarodnaj fiederacyi pravoŭ čałavieka, Mižnarodnaj Amnistyi, Sietki Damoŭ pravoŭ čałavieka, a taksama mižnarodnaha Moładzievaha pravaabarončaha ruchu (ad imia Suśvietnaha Aljansu za hramadzianski ŭdzieł CIVICUS). Ich vystupy datyčyli roznych vostrych pytańniaŭ, źviazanych z pravami čałavieka ŭ Biełarusi — svabody mirnych schodaŭ, katavańniaŭ i žorstkaha i biesčałaviečnaha abychodžańnia, admieny śmiarotnaha pakarańnia, a taksama stanovišča pravaabaroncaŭ, žurnalistaŭ i advakataŭ u krainie.

«Niahledziačy na toje, što kožnaj NDA dajecca tolki 2 chviliny, za hetymi vystupami pilna sočać pradstaŭniki dziaržavaŭ, potym jany cytujucca ŭ aficyjnych spravazdačach i dakumientach AAN, — kaža Hanna Dabravolskaja, jakaja pradstaŭlała na siesii Rady Kamitet mižnarodnaha kantrolu za situacyjaj z pravami čałavieka ŭ Biełarusi. — Meta hetych vystupaŭ — nie tolki pryciahnuć uvahu da niejkaha pytańnia, ale i prademanstravać, što za hetym uvažliva sočyć mižnarodnaja supolnaść. U svaim vystupie ja pasprabavała ahučyć klučavyja rekamiendacyi pa źmienie situacyi sa svabodaj schodaŭ u Biełarusi, padrychtavanyja Kamitetam. Siarod ich — źmiakčeńnie pakarańnia za arhanizacyju i ŭdzieł u „niezakonnych“ publičnych akcyjach, a taksama patrabavańnie nie pieraškadžać pracy žurnalistaŭ i pravaabarončych naziralnikaŭ padčas ich».

Sprava Alesia Bialackaha, biełaruskaha pravaabaroncy, aryštavanaha 4 žniŭnia pa abvinavačańni va ŭchileńni ad vypłaty padatkaŭ, stała adnym ź lejtmatyvaŭ interaktyŭnaha dyjałohu.

Hetaj ža spravie było pryśviečanaje paralelnaje mierapryjemstva, praviedzienaje 20 vieraśnia Mižnarodnaj fiederacyjaj pravoŭ čałavieka (FIDH) z udziełam Valancina Stefanoviča, vice-prezidenta Pravaabarončaha centra «Viasna», i Hanny Hierasimavaj, dyrektara Biełaruskaha doma pravoŭ čałavieka ŭ Vilni (Litva). Padčas mierapryjemstva byli ahučanyja mahčymyja dziejańni ŭ dapamohu Alesiu Bialackamu, a prysutnyja na sustrečy delehaty dziaržavaŭ taksama vykazalisia ŭ jaho padtrymku i ahučyli hatoŭnaść akazać cisk na ŭłady Biełarusi i sadziejničać jaho najchutčejšamu vyzvaleńniu.

Kamientary da artykuła