U Smalavičach pačynajuć budaŭnictva mikrarajona dla minčukoŭ

Staličnyja čarhaviki, hatovyja budavać žyllo ŭ horadzie-spadarožniku, užo ciapier mohuć źviartacca ŭ rajonnyja administracyi pa miescy pastanoŭki na ŭlik z zajavami na ŭstupleńnie ŭ žyllova-budaŭničy spažyviecki kaapieratyŭ (ŽBSK).

— Čym daŭžej hramadzianin staić u čarzie na žyllo, tym bolš u jaho šancaŭ stać čalcom hetaha kaapieratyva. Čas pastanoŭki na ŭlik, mabyć, budzie asnoŭnym kryteram adboru, — kaža namieśnik načalnika ŭpraŭleńnia žyllovaj palityki Minharvykankama Alaksandr Šeršań. — U šmatpaviarchovym domie dla staličnych čarhavikoŭ płanujecca pabudavać 3 čatyrochpakajovyja, 68 trochpakajovych, 65 dvuchpakajovych i 6 adnapakajovych kvater. Raboty pavinnyja pačacca ŭžo ŭ čaćviortym kvartale hetaha hoda. Nieŭzabavie vyznačymsia i z koštam. Pakul adzin kvadratny mietr žylla ŭ Smalavičach aceńvajecca ŭ 4–4,5 miljona rubloŭ.

Zabudova minčanami hetaha horada-spadarožnika budzie prachodzić u dva etapy. Da 2015 hoda tut źjaviacca dva rajony žyłoj zabudovy — šmatkvaternaj i indyvidualnaj. Na płoščy 600 hiektaraŭ, adviedzienaj pad katedžy, zmoža pasialicca da troch tysiač minčan, u rajonie šmatpaviarchovaj zabudovy — kala 10 tysiač.

— Viadoma, dla navasiołaŭ stvorym usiu nieabchodnuju infrastrukturu: dziciačyja sadki, škoły, abjekty bytavoha absłuhoŭvańnia i handlu, — adznačyŭ Alaksandr Šeršań. — Dla niekatorych minskich čarhavikoŭ žyllo ŭ horadzie-spadarožniku, mabyć, adziny šaniec abzavieścisia ŭłasnymi ścienami, bo terytoryja stalicy nie biaskoncaja, a žyllo patrebnaje kožnamu. Pryjom i razhlad zajavaŭ na pryjom u pieršy ŽBVK tolki pačałosia, ale, pavodle papiarednich acenak, užo ciapier 803 siamji hatovyja budavać kvatery ŭ haradach-spadarožnikach Minska.

Kamientary da artykuła