Hazon minskaha «Dynama»: ci vytrymaje «Barsiełonu»?

Piersanał stadyjona vyrašyŭ usio ž padstrachavacca ad łužyn i praśvidravaŭ na poli adtuliny, jakija zasypali druzam.

Kali nie ŭsie, to šmatlikija ŚMI prajšlisia katkom pa hazonie «Dynama»: jaho nazyvali bałotam, pašaj dla karoŭ, tankadromam, hrazielačebnicaj… Smały ŭ ahoń padlivali i niekatoryja treniery. U tym liku ŭžo były hałoŭny trenier minskaha «Dynama» Aleh Vasilenka. Jon nie saromiejučysia zhańbiŭ hałoŭnuju arenu krainy, dzie hulaje zbornaja Biełarusi i prachodziać jeŭrakubkavyja matčy, za kiepski hazon. Što ź im nie tak? Čamu ŭźnikajuć pytańni pa jakaści pola?

Adno z ajčynnych internet-vydańniaŭ trapna zaŭvažyła, što kali b chto-niebudź z pracaŭnikoŭ stadyjona abo fiederacyi futboła trapiŭ na aŭdyjencyju da čaraŭnika Hudvina, to napeŭna paprasiŭ by na hałoŭnuju arenu krainy smarahdavy hazon. Bo toj pa viaśnie sapraŭdy surjozna zaniamoh. U čym tut sprava, pytańnie i składanaje, i prostaje. Jak kaža žyćciovaja mudraść, «kali nie viedaješ, u čym sprava, dyk viedaj: jana ŭ hrašach». Tak jano i vyjšła: kašalok stadyjona nie nastolki toŭsty, kab niekalki miesiacaŭ trymać uklučanaj sistemu padahrevu, nieabchodnuju dla padtrymańnia hazona ŭ dobraj formie, a kłuby, jakija vyrašyli hulać na «Dynama» ŭ hetym siezonie, adchilili prapanovu kiraŭnictva areny padmahčy kapiejkaj. Voś i atrymałasia zamknionaje koła.

Tady dyrektar abjekta Uładzimir Vilčynski nahadaŭ, što ŭ śniežni 2010-ha i lutym 2011-ha na «Dynama» adbylisia matčy Lihi Jeŭropy. U hety čas traščali marazy, pry jakich pravodzić futbolnyja matčy vielmi ciažka. U śniežni trava była ŭ śpiačcy, ale jaje razbudzili, daŭšy zalimitavuju nahruzku na sistemu padahrevu. Paśla hulni z kijeŭskim «Dynama» jana była adklučanaja. Čamu? Akazvajecca, košt padahrevu pola ŭ sutki abychodziŭsia ŭ 2,5 młn rubloŭ. Da 17 lutaha ciapło znoŭ pajšło pad hazonam. Heta dziakujučy dapamozie kłuba BATE. Adnak paśla hulni barysaŭskaj družyny suprać francuzskaha «PSŽ» padača ciapła znoŭ spyniłasia. Ź finansavych pryčynaŭ.

Zimovyja kałatniečy z hazonam na «Dynama» dali ŭ červieni francuzskaj kamandzie padstavy dla napisańnia aficyjnaj skarhi va UEFA akurat pierad matčam z barysaŭčanami.

Ci stała pakryćcio futbolnaha pola lepšym ciapier, kali zastalisia ličanyja dni da matču barysaŭskaj kamandy suprać jeŭrapiejskaha hranda, dziejnaha pieramožca Lihi čempijonaŭ «Barsiełony»? Pa adkaz idziem na stadyjon «Dynama».

A tam vyrašali nadzionnyja prablemy: mianiali pakryćcio ŭ tuneli vychadu futbalistaŭ, ramantavali mačty aśviatleńnia, biehavuju darožku, zajmalisia malarnymi pracami i mnostvam inšych pytańniaŭ.

— Pakryćcio płastykavych kresłaŭ nastolki znasiłasia, što zastałasia tolki asnova, jakaja peckaje vopratku ŭ bieły koler, — kaža kiraŭnik. — Hetyja bialiły nie zmyvajucca vadoj. Vyrašyli dla śpiecyjalnych haściej zamović čachły. Choć pa-dobramu para mianiać kresły. Što da hazona, to jon na matčy z «Barsiełonaj» budzie dobraj jakaści, kali nie… pojdzie doždž. Sprava ŭ tym, što drenažnaj sistemy pad polem niama, tamu vada nie sychodzić. Za try z pałovaj hadziny pierad chatnim matčam nacyjanalnych zbornych Biełarusi i Bośnii i Hiercahaviny byŭ doždž, potym na poli jašče doŭha stajali łužyny. Našy rabotniki imknulisia vypravić situacyju, ale ŭ niekatorych miescach zrabić heta nie atrymałasia.

Kab nie źniasłavicca pierad haściami, rovar vynachodzić nie treba.

Darečy, napiaredadni matču BATE i «Barsiełony» piersanał stadyjona vyrašyŭ usio ž padstrachavacca ad łužyn i praśvidravaŭ na poli adtuliny, jakija zasypali druzam. Pavodle słovaŭ Uładzimira Vilčynskaha, kali śvidravali adtuliny ŭ ziamli, vonki vykopvali čałaviečyja kości, cahliny, hilzy. Jano i zrazumieła: «Dynama» pabudavali na miescy byłych habrejskich mohiłak, a padčas Vialikaj Ajčynnaj vajny spartyŭny abjekt paciarpieŭ ad varožych nalotaŭ.

— Pieražyvaju za stan hazona pierad pryjezdam top-kamand — «Barsiełony» i «Miłana», — dzielicca kiraŭnik. — Byccam zaprašaju haściej u nieprybranuju kvateru. I ničoha nie mahu zrabić. Ź inšaha boku, vieru, što chutka znojdziecca inviestar, jaki voźmiecca za rekanstrukcyju stadyjona.

Pakul ža, pryznajecca Uładzimir Vilčynski, centralnaja arena krainy ŭtrymlivajecca vyklučna za košt rečavaha rynku. Ale hetych hrošaj niedastatkova.

Jašče adzin hałaŭny bol dyrektara — aśviatleńnie.

— Bačycie ščarbatyja lampy na aśviatlalnych mačtach? — pakazvaje Uładzimir Vasiljevič. — Takich užo nie vyrablajuć. Sioleta ŭ zasiekach adnaho z rasijskich haradoŭ znajšli 30 štuk, zapłacili 44 miljony rubloŭ. Hladzieli sustreču Lihi Jeŭropy, jakaja adbyłasia ŭ Aŭstryi, hulali miascovy «Šturm» i rasijski «Łakamatyŭ»? Nie? Raptam patuchła śviatło na stadyjonie, ale praz 40 chvilin matč praciahnuŭsia. Z žacham dumaju, što było b u nas… Choć i siłkujucca aśviatlalnyja mačty z roznych punktaŭ, ale va ŭsiaho svoj resurs. A abstalavańnie stadyjona adpracavała dva-try terminy.

Kiraŭnik uspaminaje papiarednija rekanstrukcyi «Dynama»: łaŭki zamianili na płastykavyja siadzieńni, pakłali plitku na vierchnim uzroŭni areny, uładkavali biehavyja darožki vakoł pola. Praŭda, z troch etapaŭ rekanstrukcyi ažyćciavili tolki paŭtara. Praz adsutnaść srodkaŭ budaŭniki zharnuli pracy. Na žal, tak i nie darabili padtrybunnaje pamiaškańnie, bieź plitki zastaŭsia nižni ŭzrovień stadyjona, dziciačaja škoła futboła nie atrymała hazon, a taksama dach nad im. Trybuny «Dynama» zastalisia nie nakrytymi ad niepahadzi. Novych pierturbacyjaŭ tut čakajuć ź nieciarplivaściu, bo kiraŭnik Biełarusi prapanavaŭ zrabić «Dynama» vyklučna futbolnym. Ale jość adno ale: abjekt — pomnik architektury, i heta abaviazkova buduć uličvać padčas vybaru inviestara dla praviadzieńnia poŭnaj rekanstrukcyi stadyjona.

Kamientary da artykuła