Brescki harvykankam admoviŭ u praviadzieńni maršu suprać hvałtoŭnych źniknieńniaŭ
Heta vynikaje z aficyjnaha adkazu, jaki atrymaŭ zajaŭnik akcyi, miascovy pravaabaronca Raman Kiślak.
Jak paviedamiŭ Kiślak, u adkazie dajecca spasyłka na punkty rašeńnia «Ab masavych mierapryjemstvach u horadzie Breście», u jakich havorycca: kali masavyja mierapryjemstvy adbyvajucca biez udziełu orhanaŭ dziaržaŭnaj ułady i kiravańnia, arhanizatary pavinny prykłaści da zajavy dahavory z orhanami ŭnutranych spraŭ, z ustanovaj achovy zdaroŭja i z kamunalnym pradpryjemstvam.
«Jak pakazvaje praktyka, pradstaŭniki harvykankama ŭ sudzie ŭ jakaści tłumačeńnia termina „admoŭlena“ kažuć, što heta nie jość zabarona mierapryjemstva. A pakolki zakon „Ab masavych mierapryjemstvach u Respublicy Biełaruś“ pradpisvaje kiraŭniku vykanaŭčaha orhana abo „dazvolić“ abo „zabaranić“ praviadzieńnie masavaha mierapryjemstva, atrymany adkaz nie źjaŭlajecca adkazam pa sutnaści. Takoha terminu jak „admović“ hety zakon nie ŭtrymlivaje», — adznačyŭ Kiślak.
Jon maje namier abskardzić adkaz harvykankama ŭ Brescki abłvykankam i abłasnomu prakuroru.
Marš suprać hvałtoŭnych źniknieńniaŭ zajaŭlaŭsia na 30 vieraśnia. Akcyju płanavałasia pravieści z 17.00 da 18.00 na piešachodnaj častcy bulvara Kasmanaŭtaŭ z metaj pryciahnuć uvahu hramadskaści da faktaŭ hvałtoŭnych źniknieńniaŭ i inšych parušeńniaŭ prava na svabodu i asabistuju niedatykalnaść u chodzie zatrymańniaŭ u Breście.
Arhanizatary maršu taksama mieli namier pryciahnuć uvahu hramadskaści da nieabchodnaści padpisańnia kampietentnymi dziaržaŭnymi orhanami Biełarusi Mižnarodnaj kanviencyi ab abaronie ŭsich asob ad hvałtoŭnych źniknieńniaŭ jak dadatkovaj harantyi hramadzianam ad hetych złačynstvaŭ.