Kyrhyzstan nie hatovy ŭstupić u Mytny sajuz u pačatku 2012 hoda

Kyrhyzstan nie budzie hatovy ŭstupić u Mytny sajuz Rasii, Biełarusi i Kazachstana ŭ pačatku 2012 hoda, ličyć vykanaŭca abaviazkaŭ prem'jer-ministra respubliki Amurbiek Babanaŭ.

Raniej ułady Kyrhyzstana zajaŭlali, što pytańnie ŭstupleńnia respubliki ŭ Mytny sajuz moža być vyrašana na vysokim uzroŭni ŭžo ŭ kancy 2011 hoda.

«Mahu dakładna skazać i absalutna ŭpeŭniena zajavić, što 1 studzienia 2012 hoda my ŭ MS nie ŭstupim. Pakul i my da hetaha nie hatovyja, i MS nie hatovy nas pryniać», — zajaviŭ Babanaŭ 17 kastryčnika rasijskim infarmahienctvam.

«Praca pa našym ustupleńni ŭ MS pakul znachodzicca ŭ nastupnaj stadyi: my padali adpaviednuju zajaŭku na ŭstupleńnie i sfarmiravali dla vyvučeńnia detalaŭ hetaha pytańnia rabočuju hrupu na čale ź ministram ekanamičnaha rehulavańnia Učkunam Tašbajevym. Z boku ŭdzielnikaŭ MS takaja hrupa jašče pakul nie stvorana. Tamu ŭźnimać pytańnie na vysokim uzroŭni ab dałučeńni Kirhizii da MS pakul dačasna», — cytuje Babanava RIA Novosti.

Vykanaŭca abaviazkaŭ prem'jer-ministra Kyrhyzstana adznačyŭ, što rabočyja hrupy pavinny abmierkavać i ŭzhadnić šmatlikija pytańni. «U tym liku i pytańnie lhotnaha pieryjadu dla našaj krainy ŭ peŭnych siektarach ekanomiki ŭ vypadku ŭstupleńnia. My pavinny dobra razumieć, što pry ŭvachodžańni Kyrhyzstana ŭ Mytny sajuz niekalki dziasiatkaŭ tysiač ludziej ź ich siemjami, navat i niekalki sotniaŭ tysiač, zastanucca biez pracy, biez srodkaŭ da isnavańnia. My pavinny ich pracaŭładkavać ci znajści im prymianieńnie ŭ inšym siektary», — zajaviŭ jon.

Kamientary da artykuła