Spravu pravaabaroncy Kiślaka ŭ Breście viarnuli na dapracoŭku
Sud Leninskaha rajona Bresta 17 kastryčnika viarnuŭ u milicyju na dapracoŭku materyjały administracyjnaj spravy pravaabaronca Ramana Kiślaka.
Supracoŭniki milicyi zatrymali Kiślaka 16 kastryčnika prykładna ŭ 18.00 na bulvary Kasmanaŭtaŭ padčas praviadzieńnia pravaabaroncam adzinočnaha vuličnaha šeścia ŭ padtrymku
Paśla zatrymańnia Kiślaka dastavili ŭ Leninski RAUS Bresta, dzie ŭ jaho dačynieńni skłali administracyjny pratakoł na padstavie č. 1 art. 23.34 KoAP za praviadzieńnie niesankcyjanavanaha mierapryjemstva.
Noč Kiślak pravioŭ u izalatary časovaha ŭtrymańnia, adkul 17 kastryčnika byŭ dastaŭleny ŭ sud.
«Nie pačynajučy sudovaha pasiadžeńnia, sudździa zajaviŭ, što paśla vyvučeńnia materyjałaŭ majoj spravy ŭ joj vyjaŭlenyja niedachopy. I dla ich likvidacyi sprava adpraŭlajecca ŭ milicyju, — paviedamiŭ BiełaPAN Kiślak. — Ja taksama liču, heta sprava nie mahła być razhledžanaja ŭ sudzie. Sa składzienaha na mianie pratakoła nie zrazumieła, u čym kankretna ja abvinavačany, jakuju normu zakona parušyŭ i jakoje niesankcyjanavanaje mierapryjemstva pravodziŭ».
Pavodle mierkavańnia Kiślaka, u jaho dziejańniach niama składu administracyjnaha pravaparušeńnia.
«Ja papiaredziŭ Brescki harvykankam ab praviadzieńni mnoju 16 kastryčnika na piešachodnaj častcy bulvara Kasmanaŭtaŭ adzinočnaha vuličnaha šeścia suprać niezakonnaha ŭtrymańnia pad vartaj Alesia Bialackaha, — adznačyŭ Kiślak. — Heta akcyja nie padpadaje pad zakon ab masavych mierapryjemstvach, i ja nie abaviazany atrymlivać na jaje dazvołu».