Minčanin atrymaŭ 25 hadoŭ za zabojstva i zhvałtavańni

17.10.2011 / 16:47

34-hadovy minčanin pryhavorany Minskim haradskim sudom da 25 hadoŭ pazbaŭleńnia voli za sieryju asabliva niebiaśpiečnych złačynstvaŭ, učynienych im u 2006–2010 hadach. Raniej jon užo byŭ sudzimy za zhvałtavańnie niepaŭnaletniaj, kradziež majomaści, niezachavańnie patrabavańniaŭ previentyŭnaha nahladu i ŭchileńnie ad jaho, pahrozu zabojstvam, sprobu rabavańnia.

Jak paviedamiŭ staršy pamočnik prakurora Minska Siarhiej Bałašaŭ, dvornik adnaho sa staličnych pradpryjemstvaŭ pryznany vinavatym u dvuch zhvałtavańniach, troch hvałtoŭnych dziejańniach sieksualnaha charaktaru, zabojstvie, rabavańni i kradziažy.

Mužčynu zatrymali za žorstkaje zabojstva ŭ noč z 24 na 25 krasavika 2010 hoda 30-hadovaj minčanki.

Jaje trup z 14 nažavymi ranieńniami byŭ znojdzieny na leśvičnaj placoŭcy 20-ha paviercha doma na vulicy Lesi Ukrainki. Z žančynaj jon paznajomiŭsia 24 krasavika ŭ kampanii siabroŭ i zaprasiŭ jaje da siabie damoŭ. Pa darozie jana abraziła mužčynu. U adpłatu jon zaciahnuŭ jaje na 20-y pavierch susiedniaha sa svaim doma, dzie i ŭčyniŭ zabojstva. Nož kinuŭ na miescy złačynstva. Jak BiełaPAN paviedamlaŭ raniej, apieratyŭniki vyśvietlili, što zabitaja ŭ apošni čas viała antyhramadski ład žyćcia, pa miescy rehistracyi nie žyła. Milicyjaniery atrymali infarmacyju ab tym, što žančyna nie raz naviedvała kvateru, jakaja karystałasia reputacyjaj prytona. Mienavita jaho žychary dapamahli pravaachoŭnym orhanam vyjści na złačyncu.

Paśla hetaha było ŭstanoŭlena dačynieńnie zatrymanaha da inšych złačynstvaŭ.

Samaje rańniaje ź ich datujecca 13 listapada 2006 hoda. Tady minčanin na techničnym paviersie doma na vulicy Čajłytki zhvałtavaŭ 15-hadovuju dziaŭčynku, jakaja viartałasia dniom sa škoły, i ŭčyniŭ nad joj hvałtoŭnyja dziejańni sieksualnaha charaktaru.

Anałahičnyja złačynstvy jon učyniŭ dniom 1 sakavika 2010 hoda na mohiłkach «Piatroŭščyna» ŭ rajonie praśpiekta Dziaržynskaha. Achviaraj stała 28-hadovaja minčanka, jakoj złačynca padčas pałavoha akta prapanavaŭ vyjści za jaho zamuž i naradzić jamu dziaciej. Da ŭsiaho inšaha jon jaje abrabavaŭ.

Jašče adzin epizod, źviazany z hvałtoŭnymi dziejańniami sieksualnaha charaktaru, adnosicca da 2 krasavika 2010 hoda.

Złačynstva było ŭčyniena dniom u padvalnym pamiaškańni adnaho z damoŭ na vulicy Navavilenskaj. Achviaraj stała vypadkovaja sabutelnica, jakaja była značna starejšaj za złačyncu.

Minčanin taksama pryznany vinavatym u kradziažy z kvatery jaho školnaha znajomaha, učynienaha 20 krasavika 2010 hoda. Na śledstvie abvinavačvany raskazaŭ, što z haspadarom kvatery znachodziŭsia ŭ niepryjaznych adnosinach, pakolki toj u 1999 hodzie sprabavaŭ zhvałtavać jaho dziaŭčynu.

Usie złačynstvy byli ŭčynienyja ŭ stanie ałkaholnaha apjanieńnia.

Pryhavor Minskaha haradskoha suda byŭ abjaŭleny 14 krasavika 2011 hoda i paśla kasacyjnaha razhladu ŭ Viarchoŭnym sudzie nabyŭ moc.

25 hadoŭ asudžany praviadzie ŭ kałonii strohaha režymu. Da jaho taksama buduć užytyja prymusovyja miery biaśpieki i lačeńnia ad ałkahalizmu.

Čytajcie taksama:

Kamientary da artykuła