Administracyja kałonii zacikaviłasia zdaroŭjem Źmitra Bandarenki
Palitviazień pakul nie viedaje, čym abaviazany takoj niečakanaj uvazie.
Administracyja mahiloŭskaj kalonii vyjaŭlaje padvyšanuju ŭvahu da zdaroŭja palitźniavolenaha Źmitra Bandarenki. Eks-kandydatu na prezydenta Mikołu Statkieviču na asabisty rachunak u škłoŭskaj turmie nie dajšli dźvie pensii. Maładafrontaviec Eduard Łobaŭ sustreŭsia z maci ŭ turmie «Vaŭčynyja nory». Były kandydat na prezydenta Andrej Sańnikaŭ i lider «Maładoha frontu» Źmicier Daškievič praciahvajuć adbyvać karantyn u turmach Babrujsku i Hłybokaha.
Palitźniavoleny Źmicier Bandarenka dasłaŭ z mahiloŭskaj turmy adrazu čatyry listy, u jakich paviedamlaje, što administracyja razam ź lekarami turemnaha špitala pačali nadzvyčaj cikavicca stanam jahonaha zdaroŭja, paviedamiła «Svabodzie» žonka Volha Bandarenka: «Piša, što apošnim časam administracyja kalonii i medyki nastojliva raspytvajuć pra stan jahonaha zdaroŭja. Jon kaža, što piać miesiacaŭ paśla aperacyi nia toje što nie cikavilisia i nie dapamahali, a rabili ŭsio horš — i ciažkaści ciahaŭ, i pa leśvicach chadziŭ — naadvarot, tolki paharšali stanovišča. A ciapier rekamendujuć sadzicca i h.d. Kaža, što nia viedaje, z čym heta źviazana».
Były kandydat na prezydenta Andrej Sańnikaŭ praciahvaje adbyvać karantyn u kamery-adzinočcy babrujskaj turmy. Dniami jaho naviedaŭ advakat, praź jakoha palitviazień prasiŭ pieradavać jamu bolej litaratury, paviedamiła «Svabodzie» žonka Iryna Chalip: «Da jaho dachodziać hazety, jon atrymlivaje listy, jakija jaho vielmi padtrymlivajuć. I jašče jon prasiŭ dasyłać časopisy, knihi, i voś ja zaraz dasyłaju. Bo razumieju, što siadzieć u čatyroch ścienach uvieś čas — heta možna z hłuzdu źjechać z-za taho, što ničoha nie źmianiajecca i niama čaho rabić».
Padčas sustrečy jašče adnaho eks-kandydata na prezydenta Mikoły Statkieviča z baćkam Viktaram Statkievičam stała viadoma, što na asabistym rachunku palitviaźnia nie chapaje dźviuch jahonych pensijaŭ, paviedamiła žonka Mikoły Statkieviča Maryna Adamovič:
«Hrošy na rachunku Mikałaja jość, u tym liku tyja, što ludzi pieraličvali jamu da dnia narodzinaŭ. Ale Mikoła pra ich nia viedaje, bo jamu nie paviedamlajuć. Dźvie pensii Mikoły dzieści źnikli, bo ich pačali pieravodzić u kaloniju biez majoj, jahonaj ci jašče čyjoj-niebudź voli, jašče sa žniŭnia. Ale pieršy pieravod źjaviŭsia tolki ŭ kastryčniku. Kali bližejšym časam hrošy nia źjaviacca, to budziem sudzicca — dzie padzieli pensii Mikoły Statkieviča».
Doŭhaterminovaje spatkańnie z maci ŭ ivacevickaj turmie «Vaŭčynyja nory» ciaham troch minułych dzion atrymaŭ maładafrontaviec Eduard Łobaŭ. Maci Maryna Łobava paviedamiła «Svabodzie», što na syna pierastali cisnuć u spravie napisańnia prašeńnia ab pamiłavańni. Jon taksama nia skardziŭsia na ŭmovy ŭtrymańnia. Ale z turmy maci viarnułasia ŭ pryhniečanym stanie: «Kaniečnie, ja zadavolenaja, što pabačyła jaho, što jon dobra vyhladaje. Ale vielmi ciažka było jaho pakidać, kali jaho viali za kraty. Tam takija dźviery zakratavanyja, i jaho tudy za hetyja dźviery paviali. Heta vielmi pryhniataje maralna, asabliva kali viedaješ, što jon ni ŭ čym nie vinavaty. Kali viedaješ, što nastupnaje spatkańnie nia chutka, tolki viasnoj. Tudy ja jechała z dobrym nastrojem, ščaślivaja była, što pabaču, a ciapier viartajusia ŭ pryhniečanym stanie i z raźbitym nastrojem».
Paplečnik Eduarda Łobava, lider «Maładoha frontu» Źmicier Daškievič paśla pieravodu ŭ kaloniju ŭ Hłybokim zastajecca ŭ kamery-adzinočcy. Čakajecca, što ŭ nastupnym miesiacy jamu dazvolać sustreču z baćkam.