Viaźni padtrymali pryncypovaść palitviaźnia Łobava
«Kali nie vinavaty, to ŭ čym kajacca?» — kažuć jany.
Z aktyvistam «Maładoha frontu» Eduardam Łobavym sustrełasia ŭ Ivacevickaj kałonii jahonaja maci Maryna Łobava. 17 kastryčnika Maryna Łobava viarnułasia sa spatkańnia i paviedamiła:
«Spatkańnie było doŭhaterminovym, takim čynam, byŭ čas pahavaryć.
Syn raskazaŭ, što viaźni kałonii ŭchvalajuć jahonuju admovu pisać prašeńnie ab pamiłavańni.«Kali nie vinavaty, to ŭ čym kajacca?» — kažuć jany. Kaniečnie, jość i takija, jakija ździŭlajucca. Bo jamu dastatkova napisać prašeńnie z pryznańniem viny — i vyjści na volu. Niekatoryja ŭ takoj situacyi nie sumniavalisia b, što rabić. Ale tut sprava pryncypu, i syn nie zdajecca.
Skazaŭ hetak: «Nie ciešu siabie iluzijami, što chutka adpuściać — kab nie było ciažej. Kali tre budzie, adsiadžu i da kanca terminu».
Eduard Łobaŭ asudžany na 4 hady źniavoleńnia pavodle abvinavačańnia ŭ chulihanstvie, jakoje, pavodle sudu, učyniŭ razam ź lidaram «Maładoha frontu» Źmitrom Daškievičam 18 śniežnia 2010 hoda. Aktyvisty svajoj viny nie pryznali i zajavili pra pravakacyju śpiecsłužbaŭ, źviazanuju z vybarami. U ivacevickaj kałonii «Vaŭčynyja nory», dzie adbyvaje pakarańnie Eduard Łobaŭ, jamu ŭžo niekalki razoŭ prapanoŭvali napisać prašeńnie ab pamiłavańni na imia Alaksandra Łukašenki, ale aktyvist admaŭlaŭsia.