Na pradpryjemstvie Minbudarchitektury rabili levyja zakazy
Śledčym upraŭleńniem papiaredniaha rasśledavańnia HUUS Minharvykankama raspačataja novaja kryminalnaja sprava ŭ dačynieńni da słužbovych asobaŭ AAT «Pramtechmantaž» Ministerstva architektury i budaŭnictva.
U červieni pravaachoŭnymi orhanami Minska była raspačataja kryminalnaja sprava ŭ dačynieńni da dyrektara mantažnaha kiravańnia AAT «Pramtechmantaž» Minbudarchitektury i jaho namieśnika. Im inkryminavałasia złoŭžyvańnie ŭładaj abo słužbovymi paŭnamoctvami. Nibyta padčas budaŭnictva ŭłasnych damoŭ jany prymušali rabotnikaŭ pradpryjemstva pracavać na siabie.
Paźniej było raspačata jašče niekalki kryminalnych spravaŭ u dačynieńni da padazravanych, u tym liku pa padazreńni ŭ atrymańni chabaru i kradziažy budaŭničych materyjałaŭ na dziasiatki miljonaŭ rubloŭ. Ciapier u dačynieńni da byłoha namieśnika dyrektara raspačataja novaja kryminalnaja sprava.
Pavodle dadzienych pravaachoŭnych orhanaŭ, padazravany sa studzienia 2010 hoda pa červień 2010 hoda, vykarystoŭvajučy słužbovyja paŭnamoctvy, z karyślivaj zacikaŭlenaści, jakaja vyraziłasia ŭ žadańni atrymać niezakonnaje ŭznaharodžańnie, zahadzia abhavorvaŭ košt apracoŭki adnoj tony mietału z dyrektaram TAA, biez dakumientalnaha afarmleńnia arhanizavaŭ apracoŭku 85 ton mietału supracoŭnikami pradpryjemstva ŭ intaresach nazvanaha TAA. Pavodle papiarednich dadzienych śledstva, hetyja dziejańni nanieśli dziaržpradpryjemstvu škodu ŭ pamiery kala 66 miljonaŭ rubloŭ.
Śledstva ličyć, što za vykanańnie levaha zakazu namieśnik dyrektara atrymaŭ uznaharodu ŭ pamiery 17 tysiač dalaraŭ ZŠA.