Zachodniaja presa: Hazavaje pahadnieńnie ź Minskam — pieramoha Kramla
Zachodnija ŚMI kamientujuć rašeńnie rasijskaha ŭrada ab vydzialeńni Biełarusi kredytaŭ, a taksama pryrodnaha hazu pa źnižanaj canie ŭ abmien na nabyćcio «Hazpramam» 100% «Biełtranshazu».
Jak piša žurnalist The New York Times Endru Kramier, hetaje pahadnieńnie załučaje Biełaruś u jašče bolš ciesny sajuz z Rasijaj.
«Kredyty i źnižki dajucca prezidentu Biełarusi Alaksandru Łukašenku, kab dapamahčy jaho ŭradu subsidyjavać asnoŭnyja pradukty charčavańnia i impartnyja tavary, strymać inflacyju i sacyjalnuju niestabilnaść. U abmien Biełaruś całkam pradaść rasijskamu enierhietyčnamu hihantu „Hazpramu“ svoj hazapravod, jaki idzie ŭ Jeŭropu», — paviedamlaje aŭtar artykuła «Hazavaje pahadnieńnie ź Biełaruśsiu daje Rasii kantrol nad trubapravodam».
Kramier nahadvaje, što «Hazpramu» ŭžo naležali raniej 50% u hazapravodzie
Z momantu raspadu Savieckaha Sajuza «Hazpram» imknuŭsia viarnuć kantrol nad sietkaj trubapravodaŭ, jakija źjaŭlajucca nieadjemnaj častkaj jaho biznesu i važnym składnikam hieapalityčnaj pazicyi Rasii va Uschodniaj Jeŭropie, — havorycca ŭ artykule. Kantrol «Hazprama» nad trubapravodam
Poŭny kantrol «daść mahčymaść zabiaśpiečyć biezumoŭny tranzit praź biełaruskuju terytoryju našych enierhanośbitaŭ spažyŭcam u Zachodniaj Jeŭropie», — skazaŭ jon.
«Pahadnieńnie, padpisanaje ŭ Maskvie, aznačaje važnuju pieramohu Kramla, jaki paśpiachova karystajecca svajoj rolaj pastaŭščyka enierharesursaŭ z metaj umacavańnia ŭpłyvu na terytoryi byłoha Savieckaha Sajuza, — piša Ałan Kulisan na staronkach The Wall Street Journal. — Biełaruś, raźmieščanaja pamiž zachodniaj miažoj Rasii i Polščaj, doŭhi čas supraćstajała rasijskamu ŭpłyvu, admaŭlajučysia pieradać rasijskamu vytvorcu hazu, AAT „Hazpram“, hazapravodnuju sietku i patrabujučy tannaha ekspartu, kab subsidyjavać svaju ekanomiku savieckaha typu».
Łukašenka na praciahu doŭhich hadoŭ utrymlivaŭ raŭnavahu z Rasijaj, pałochajučy jaje pierśpiektyvaj zbližeńnia z Zachadam, havorycca ŭ artykule. Ale raŭnavaha była parušanaja ŭ minułym hodzie, kali Łukašenka raspačaŭ žorstkija kroki ŭ dačynieńni da palityčnaj apazicyi, čym vyklikaŭ asudžeńnie ES i Vašynhtona.
«Zaklučanaje ŭ piatnicu pahadnieńnie aznačaje jašče bolš surjozny pavarot u bok Maskvy, nie nastolki krytyčny da jaho aŭtarytarnych zamašak. Jano było zaklučanaje na nastupny dzień paśla taho, jak Minsk asudziŭ pravaabaroncu Alesia Bialackaha da 4,5 hady pazbaŭleńnia voli za ŭchileńnie ad padatkaŭ», — havorycca ŭ artykule pad nazvaj «Rasija ŭzmacniaje kantrol nad Biełaruśsiu».
Z punktu hledžańnia ES, hetaje pahadnieńnie niasie supiarečlivy sihnał, — piša Stefan Uehstył u błohu The Financial Times beyondbrics.
«Poŭny kantrol „Hazprama“ nad biełaruskim hazapravodam asłabić upłyŭ niepradkazalnaha prezidenta Alaksandra Łukašenki», — adznačaje aŭtar. Heta moža zrabić bolš nadziejnymi pastaŭki hazu ŭ Jeŭropu.
Ale heta adbudziecca koštam nadzialeńnia Rasii jašče bolšym, čym ciapier, palityčnym upłyvam u Minsku. Ažyćciaŭleńnie stratehii ES pa zbližeńni sa svaimi ŭschodnimi susiedziami — pierš za ŭsio Biełaruśsiu, Ukrainaj i Małdovaj — uskładnicca jašče bolš.
«Tak što ES moža vyjhrać ekanamična, ale prajhrać palityčna, — robić vysnovu aŭtar. — Ekanamičnyja pieravahi ŭ budučyni taksama mohuć syści na ništo, kali „Hazpram“, uzmacniŭšy kantrol nad trubapravodami, pavysić košty», — havorycca ŭ artykule nad nazvaj «Hazpram»: pieramoha ŭ Biełarusi».