Sustaršynia Jeŭraniesta nazvaŭ biełaruskuju krytyku Uschodniaha partniorstva absurdam
Sustaršynia Jeŭraniesta, były ministr zamiežnych spraŭ Ukrainy Barys Tarasiuk ličyć biełaruskuju krytyku Uschodniaha partniorstva absurdam.
U kastryčniku ministr zamiežnych spraŭ Biełarusi Siarhiej Martynaŭ nazvaŭ hałoŭnym niedachopam Uschodniaha partniorstva adsutnaść «praktyčnych, realnych spraŭ».
Barys Tarasiuk prakamientavaŭ hetuju zajavu nastupnym čynam: «Daj boh Biełarusi ŭvajści ŭ praces Uschodniaha partniorstva, i ŭ Biełarusi budzie vielmi šmat pracy. Ukraina ŭžo prajšła hety šlach. I na toje, što Biełarusi jašče treba prajści, u nas pajšli hady. Tamu krytykavać miechanizm supracoŭnictva ź Jeŭrapiejskim sajuzam, nie budučy ŭdzielnikam hetaha miechanizma, — heta, vybačajcie, absurd».
Kanfierencyja staršyniaŭ palityčnych frakcyj Jeŭraparłamienta 10 lutaha pryniała rašeńnie ab sklikańni pieršaha pasiadžeńnia Jeŭraniesta bieź biełaruskaj delehacyi.
Pastanova pačać pracu Jeŭraniesta biez pradstaŭnikoŭ hramadzianskaj supolnaści i parłamienta Biełarusi była pryniata ŭ Jeŭraparłamiencie adnahałosna.
Raniej praduhledžvałasia, što ŭ pracy Parłamienckaj asamblei prahramy Jeŭrasajuza «Uschodniaje partniorstva» (Jeŭraniest) voźmuć udzieł 60 jeŭradeputataŭ, a taksama pa 10 pradstaŭnikoŭ (u asnoŭnym parłamientaryjaŭ) ad Hruzii, Ukrainy, Armienii, Azierbajdžana, Małdovy i Biełarusi. U dačynieńni da apošniaj razhladalisia roznyja varyjanty: zaprašeńnie vyklučna apazicyi abo apazicyi i piaci pradstaŭnikoŭ parłamienta. Adnak hetyja idei nie znajšli razumieńnia ni ŭ aficyjnaha Minska, ni ŭ šerahu krain — susiedziaŭ ES.
Ustanoŭčaje pasiadžeńnie Jeŭraniesta prajšło ŭ Brusieli 3 maja biez udziełu Biełarusi.