Lavon Volski: «Mnie škada hetych durnych i biezdapamožnych ludziej»

Arhanizatary kancertu Lavona Volskaha ŭ Breście sutyknulisia z prablemaj. Paśla telefanavańnia źvierchu za niekalki hadzin da pačatku administracyja ŭstanovy vymušanaja była admianić mierapryjemstva.

U Brest Lavon Volski zajechaŭ paśla šerahu kancertaŭ u Jeŭropie. Muzyka vystupaŭ u Prazie, Bierlinie i Biełastoku. Pradstaŭlaŭ prahramu z najlepšych piesień z usich prajektaŭ, da jakich mieŭ dačynieńnie: ad «Mroi» pačynajučy i «Saŭkam dy Hryškam» zakančvajučy. Kancerty byli akustyčnymi, u padarožža Lavon vypraviŭsia razam z hitarystam Aleham Harusam i Maciejem Saburavym, jaki dapamahaŭ z hukam dy padyhryvaŭ časam na tamburynie.

U Breście muzyku čakali. 25 listapada tut była zapłanavanaja impreza ŭ kaviarni «Svajaki». Arhanizatar rok-kancertaŭ u hetym horadzie Źmicier Nazaraŭ kaža, što paśla šerahu zabaronaŭ jaho imprezaŭ u vialikich załach jon abraŭ farmat nievialikaj siabroŭskaj sustrečy. Ale i takoje pilnujuć. «U dzień kancertu haspadar kaviarni patelefanavaŭ i paviedamiŭ, što viečarynu nie budziem pravodzić. Choć da hetaha momantu jon byŭ zusim nie suprać, dy i ŭsie stoliki byli ŭžo zamoŭlenyja», — kaža Źmicier. Na dyrekcyju ŭstanovy jon nie narakaje i razumieje, što tyja musiać vykonvać «pažadańni» źvierchu, kab nie pazbavicca svajho biznesu.

«Niešta zusim stali pierahinać z hetymi zabaronami, — kaža Lavon Volski. — Vajciuškieviču sarvali nievialički vystup, ciapier nam pasprabavali. Śmiešnymi vyhladajuć hetyja sproby. Mnie, pa ščyraści, škada durnych i biezdapamožnych ludziej, jakija zajmajucca takimi rečami». U apošni momant jaho kancert atrymałasia pieranieści ŭ zału hreka-katalickaha kaścioła. Sa słovaŭ muzyki, vystup atrymaŭsia prosta vydatnym: «Spačatku była nievialičkaja naściaroha, my navat dumali padkarektavać prahramu, bo nie raźličvali hrać u sabory. Ale pa vyniku atrymałasia ŭsio vielmi arhanična. Pryjšło šmat ludziej, nas vielmi pryjazna sustreli i my vykanali ŭsio, što płanavali».

Ciapier muzyka rychtujecca da vystupu ŭ lehiendarnaj «Kamčatcy». 3 śniežnia Lavon adyhraje kancert u kłubie-muziei «Kotielnaja Kamčatka» ŭ Pieciarburhu. Z hetaj nahody jon navat padumvaje zrabić biełaruskuju viersiju adnoj ź piesień Viktara Coja. «My zaŭždy imkniemsia raznastaić prahramu na kožnym kancercie, bo niemahčyma hrać adno i toje ž», — kaža Lavon.

Na kancert Volskaha dy ekskursiju pa biełaruskim Pieciarburhu možna vypravicca razam z turystyčnym ahienctvam «Delfin-hrup». Padrabiaźniej praz telefony +375-29-708-95-18, +375-44-710-43-68.

A 8 śniežnia Volskaha pabačyć i pačuć možna budzie na solnym kancercie ŭ Varšavie, u kłubie Spoldzielnia CDQ (Burakowska, 12).

Kamientary da artykuła